Украинайиъ кIули гъябгъюрайи хусуси метлеб айи дявдин операцияйиъ иштирак шулайидарин хизанар «Жувандариз кюмек» («Помощь СВОим») акцияйин дахилнаъди гьамусдихъантина республикайин МФЦ-йин филиалариъ нубат дарди кьабул апIиди.
РД-йин гизаф гъуллугъар гьуркIру центриан (МФЦ) туву мялуматариинди, му акцияйиз асас вуди, СВО-йин иштиракчйирин хизанарихьан гьюкуматдин 70-тIан артухъ гъуллугъар гьуркIуз шулу. Гьадму гъуллугъарин арайиъ ЖКУ-йин льготйирин, гьюкуматди яшамиш хьуз кюмек вуди туврайи пулин дакьатарин ва гьацдар жарадар а.
Мидланра гъайри, къайд дапIнайи 70 гъуллугънан арайиъ хусуси метлеб айи дявдин операцияйиъ иштирак шулайидарин хизанар ляхнихъди тямин апIбаз кюмек тувувалин, жюрбежюр налогариккан азад апIувалин ва гьацдар жара гъуллугъар гьуркIувал гьисабназ гъадагъна. Нубатнахъ дудругъжвди чпин гъуллугъ гьубкIбан бадали, хусуси метлеб айи дявдин операцияйин иштиракчйирин хизанариз кIури, республикайиъ айи МФЦ-йин вари филиаларин терминалариъ дурариз жаради вуйи кнопка гьязур дапIна. Гьадму кнопка ишлетмиш дапIну, дицдар касариз чпин гъуллугъ гьубкIуз мумкинвал а.
«Жувандариз кюмек» акцияйин гьякьнаан хъанара жара суалар арайиз гъюраш, 666-999 телефондин нумрайиз зенг дапIну, гъавриъ адрубдин гьякьнаан суал тувуз шулу.
