Вари уьлкейиъ гьяракатнаъ айи «Сагъламвал уьбхювал» милли проектдик кипнайи региондин «Сагъламвал уьбхбан сифтейин звено цIийи алапIувал» программайин дахилнаъди Хив райондин Сюгют гъулаъ фельдшервалинна акушервалин пункт цIийи алапIура.

 

 

«Гъябгъюрайи йисан Сюгют гъулан ФАП дибдиан расвалин ляхнар гъахуз «Сагъламвал уьбхбан сифтейин звено цIийи алапIувал» программайик кипнийча. Иццурайидар кьабул апIру, прививкйир апIру ва медицинайин серенжемар кIули гъахру шубуб кабинетдикан ибарат вуйи тикилишдиъ гьамусяаьт расвалин ляхнар кIули гъягъюра. ФАП-дин кабинетарси, чIатанди вуйи цаларра къайдайиз хиди. Багарихьди Сюгют гъулан агьалйири медицинайин сабпи кюмек ужудар шартIариъ гъадабгъуз хъюгъди», – мялум гъапIну Хив райондин кьялан больницайин кIулин духтир Индира Багъичевайи.
Дугъу къайд гъапIганси, цIийи ФАП-ар тикмиш апIуз, хъа йирсидар дибдиан рас апIуз диш дапIнайи «Сагъламвал уьбхбан сифтейин звено цIийи алапIувал» региондин программа гележегдиъра Хив райондиъ гьяракатнаъ гъубзди.