Хив райондиъ, мектебариъ урхурайидарин ва живанарин арайиъ бажаранвал кайидар агури, бицIидарин яратмиш’валин мумкинвалар артмиш ва аргъаж шулайи насил милли мяълийирихьна жалб апIури, «БицIидарин сес» милли конкурс гъабхувал аьдатнаъ ипна. Гъубшу йисан райондиъ думу конкурсдихьна варидарин маракьлувал лап аьхюб гъабхьнийи. Ва магьа варидариз ужуб хабар туврача – конкурс гъябгъюрайи йисанра гъабхуру.
«Конкурсдин метлеб – би-цIидариз аьлава образование туври, дурар вокалиан аьгъю-валар гъадагъбиина жалб апIувал, дурарин мяъли апIбан устадвал артмиш апIувал, табасаран, лезгиф ва урус чIалниинди мяълийир апIурайи Хив ва Табасаран районарин, гьацира чпин абйир-бабарихъди Хив райондиан жара шагьрариз кючмиш духнайи бицIидарин арайиъ яратмиш апIбан бажаранвал кайидар ашкар апIувал ву. Ав, гъалатI гъахьундарза, гъябгъюрайи йисан конкурсдиъ табасаран, лезги чIал аьгъю вая табасаран чIалниинди мяъли апIуз гъудубгъу фунуб вушра миллетдин вакиларихьан, ва гьацира Хив райондиан Дагъустандин вая Урусатдин шагьрариз, гъулариз кючмиш духьнайидарихьан иштирак хьуз шулу», – гъапну ич сюгьбатнаъ Хив райондин культурайин отделин кIулиъ айи Казбек Къазиевди.
Дугъан гафариинди, конкурсдиъ яшар 6-йислан 17 йис хьайизкьан вуйи бицIидарихьан ва живанарихьан иштирак хьуз шулу.
Конкурсдиъ иштирак хьуз анкетйир гъябгъюрайи йисан 1-пи апрелиан 13-пи апрелиз кьабул апIура. «БицIидарин милли сес – 2023» конкурсдин анкета kultura-khiv@yandex электронный почтайиз вая инстаграммдин @kkz_kultura аккаунтдиз, ясана телеграмдин @kkz_kultura канализ хъадапIну ккунду.
Анкета адрабцIди конкурсдиз кьабул апIудар. Конкурсдиъ иштирак шулайи-дарин сиягь гъябгъюрайи йисан 13-пи апрелиъ инстаграммдин @kkz_kultura аккаунтдиъ ва телеграммдин @kkz_kultura каналиъ тувди.
Мяълийириз гьязур дапIнайи фонограммйир конкурс ккебгъайиз 2-3 йигъ улихьна kultura- khiv@yandex электронный почтайиз хъадаъну вая Хив гъулан РКДЦ-йиз духну ккунду. Конкурсдин гьякьнаан суалар гъахьиш, телефондин 89034991093 нумрайиз зенг дапIну, лазим вуйи мялуматар гъадагъуз шулу. Конкурс ккебгъбан кьяляхъ, мяълийир апIру йигъан фонограммйир ва аьрзйир кьабул апIудар.
Мяълийир анжагъ табасаран, лезги ва урус чIалариинди дапIну ккунду.
Конкурсдиъ сабпи йишв гъадабгъуриз 10 агъзур манат, кьюбпи йишваз – 8 агъзур манат ва шубубпи йи-шваз – 5 агъзур манат тувди. Мидланра гъайри, пешкешнан йишвар гъадагъу вари иштиракчйир ва гъалибчйир дипломариинди, хъа тамашичйир варитIан гьевеслу гъапIу иштиракчи 3 агъзур манат ва 1-пи – 10-пи йишвар гъазанмиш гъапIу вари иштиракчйир аьлава вуди агъзур манат тувбиинди лишанлу апIиди.
Конкурсдиъ иштирак хьуз ккунидари анкета инстаграммдин @kkz_kultura аккаунтдиъ вая телеграммдин @kkz_kultura каналиъ абцIай.
