Хючнаъ ерлемиш дубхьнайи Табасаран райондин гимназияйиъ гьар йисан саб ражну уьлкейин жюрбежюр вузариъ ва техникумариъ урхурайи мектебарин выпускникарихъди гюрюш кIули гъабхувал аьдат дубхьна.
Магьа ццира цIиб улихьнаси гимназияйин 2020-пи йисандин выпускникарихъди гюрюш кIули гъубшнийи.
Уьлкейин жюрбежюр вузариъ урхурайи студентари чпин коллективарикан, урхбаъ алахьру читинваларикан, багъри мектебди чпин юкIвариъ гьаргандиз гъиту фикрарикан ктибтнийи. Хъасин гимназияйиъ урхурайидари студентариз жюрбежюр суаларра тувнийи.
Студентари гъюзимбу выпускникариз чпин урхуваликан, уьмрикан ктибтнийи. Гюрюш лап маракьлуди, зарафтариинди, ужудар ихтилатар апIури, суалар гъахьиш, дурариз жавабарра туври, мянфяаьтлуди кIули гъубшну.
Му гюрюшдин кьяляхъ гимназияйин директор Элина Шихмягьямедовайи гюрюшдин иштиракчи Самира Рамазановайикан, дугъу мектебдиъ урхурайиганра, гъи вуздиъра мюгькам аьгъювалар гъадагъурайивализ лигну, макьала бикIуб ккун гъапIнийи. Дупну ккундуки, 2022-пи йисан Дагъустандин варитIан адлу вузарин студентарин арайиъ «Дагъустандин студентарин хьадукар – 2022» гала-концертдиз ужударсдар 21 нумра адагънийи. Гьадрарин арайиъ «Милли вокал» номинацияйиъ «Табасаран» мяъли хьади Самира удучIвнийи, ва натижайиъ думу фес-тивалин лауреат гъахьнийи.
«Гъийин ихь мектебдин асас вазифа – артмиш шулайи жямяаьтлугъдиз хас вуйи аьгъювалар айи ва зегьметниин юкIв али ватандашар тербияламиш апIувал ву. Думу вазифа тамам апIбаъ мялимар, абйир-бабар ва урхурайидар сабхилди иштирак духьну ккунду. Гьаци вуйивал ихь уьмрин тажрубайи тасдикь апIура. Самира мектебдиъ урхури имидитIан заан аьгъювалар гъадагъурайи, аькьюллу, гьарсаб жямяаьтлугъ ляхниъ жанлуди иштирак шлу урхурайидарин сабпи жергайиъ айир ву. Дугъаз «Студентарин хьадукар» фестивалиъ иштирак хьувал кьисмат гъабхьну. Самирайи, душваъ чан заан активвал улупну, ихь райондин урхурайидарин, чаз дарсар киву мялимарин ва, гьелбетда, чан дада Эльмирайи гъизигу зегьмет субут гъапIну. Ва гьацира Самирайи мектеб гъизилин медализ ккудубкIну», – ктибтнийи узуз Элина Шихмягьямедовайи.
Къайд дапIну ккундуки, Самирайин хъуркьувалар гьаци сабпну арайиз гъафидар дар. Дурарин хизандиъ аьгъювалар гъадабгъбаз эгьемият тувувал аьдати ляхин ву. Самирайин дада Эльмира Рамазанова Табасаран райондин администрацияйин пресс-секретарди лихура. Шуран хъуркьуваларикан хабар гъабхьи узу Эльмирайихъдира сюгьбат гъубхунза.
«Самира йиз риш ву кIури, тяриф апIурадарза, думу бицIиди имидитIан зигьим айи, бажаранвал кайи велед вуйиз. Вари ляхнар кIул’инди апIрур вуйи. Учв бицIир вушра, фукьан варибдин гъавриъ айир, фунуб ляхинра удукьрур даринхъа, йиз риш, кIури, дугъ’инди дамагъ апIури шуйза. Шураз дарсариз гьязур хьуз затра кюмек гъапIур дарза – думу учв аьшкьниинди аьгъювалар гъадагърур вуйи. Самира мектебдиъ имиди гизаф мяълийирин конкурсариъ, республикайин мектебариъ урхурайидарин арайиъ химияйиан ва биологияйиан кIули гъуху олимпиадйириъ иштирак гъахьир ву. БицIи вахтна узу чаз жакул вая жара уюнжагъар масу гъадагъруган, лизи халат алидар ва духтрариз ухшар айидар гъадагъ, кIуйи. Гьаддиз гъи дугъу чан бажаранвалар ДМГУ-йиъ улупура», – гъапнийи Эльмира Рамазановайи.
