Мартдин 29-пи йигъан Хив райондиъ республикайин мяна айи «Мамраш – Ташкапур – Аракиндин гъяд» машинар гъягъру рякъюъ ерлешмиш дубхьнайи АрхътIарин гъяд расвалин ляхнар гъахбан кьяляхъ ачмиш гъапIну.

 

 

КIваин апIуз ккундучуз, 2023-пи йисан январин 14-пи йигъан думу гъяд дутIубкIну, 15-20 см йишв гъябхънийи. Гъяд’ин гьадму йигъланмина расвалин ляхнар кIули гъахури гъахьну.

Расвалин ляхнар ккудукIну, гъяд улихьдин гьялназ хпан кьяляхъ, думу рас гъапIу инженер-конструктор Аьбдуллагь Гимбатов райондин агьалйирихьна ва хяларихьна гъядлан машин хъапIру вахтна гьяракат цIиб апIбан теклиф хьади илтIикIну.

«Гьюрматлу Хив райондин жямяаьт ва хялар!

Учу гаф тувганси, гъи, 29-пи мартдиъ, сяаьт 9-диъ вари жюрейин машинар хъауз ихтияр ади АрхътIарин гъяд абццуваликан узу аьхю шадвалиинди мялум апIураза. Ватандашарин ва райондин администрацияйин терефнаан аьхю кьадар тIалабар айивализ лигну, гъяд ачмиш апIбан серенжемар цIиб улихьна кIули гъахурача.

Расвалин ляхнар аьхирихъна гъюра, ва учвкан ич устйириз манигъ’вал дарапIувал ва гъядлан машин саб сяаьтна 20 километртIан гьялак дарди хъапIувал ккун апIурача. Мидкан гъяд’ин улучIвру йишвахь хьайи рякъюъ гьяракат апIбан къайда уьбхру лишнарикра дупна», – къайд гъапIнийи чан илтIикIбаъ Аьбдуллагь Гимбатовди.