30-пи мартдиъ «Хив район» муниципальный образованиейин ургубпи дих апIбан депутатарин Собраниейин 21-пи сессия кIули гъубшну. Сессияйиъ гьял апIбан бадали, 6 месэла адагънайи.
Сессияйиъ райондин 2022-пи йисандин яшайишдинна артмиш’валин натижйирикан ва 2023-пи йисаз улихь дийигънайи месэлйирикан асас доклад хьади «Хив район» муниципальный образованиейин кIулиъ айи Ярмет Ярметов удучIвну гъулхнийи.
«Ккудубшу 2022-пи йис Хив райондиз читинуб гъабхьнушра, райондин яшайишдинна экономикайин артмиш’вализ тясир апIру метлебнан программйир ва милли проектар уьмриз кечирмиш апIбаъ хъуркьуваларра адарди дар. Гьюрматлу гъарашугъар, ичв кюмекниинди улихь дивнайи месэлйир саки гьял апIуз мумкинвал гъабхьну», — ккебгънийи чан удучIвну улхуб Ярмет Ярметовди.
Райондин главайи туву мялуматариинди, Хив райондиъ асас вуди тикилишар дивбан гьяракат ужуб ву. Райондиъ гизаф ляхнар жямяаьтлугъдин кюмекниинди тамам апIура.
2022-пи йисандин натижйириинди, райондин сатIи вуйи бюджетдиз гъюру налогарин ва налогарин дару гъазанжарин планар 109,4% тамам гъапIну, яна план 72,06 миллион манат вуйиш, бюджетдиз 78,8 миллион манат гъафну.
Райондин промышленностдикан улхури, Ярмет Ярметов Ляхлаарин ва Мажвгларин халачйирин фабрикйириин дийигънийи. Думу фабрикйири 2022-пи йисан 20,05 миллион манатдин сурсат гьясил гъапIну. 2021-пи йисандин улупбарихь тевиган, думу улупбар 4,4%-дин артухъди ву.
Дагълу аьтрафар артмиш апIбан гьюкуматдин программа уьмриз кечирмиш апIури, тялукь вахтна республикайин бюджетдиан вуйи дакьатарихъ хусуси 33 мяишатдиз 2,9 миллион манатдин кьимат айи гъулан бицIи техника масу гъадабгъну. Думу программа гьаму йисанра давам шула, — къайд гъапIнийи Ярмет Ярметовди.
Хив райондиъ «Сагъламвал уьбхювал» милли проект уьмриз кечирмиш апIури, райондин кьялан больницайиз медицинайин сифтейин кюмек тувбан дахилнаъди 846 380 манатдин кьиматнаъ айи саб машин, 2,7 миллион манатдин медицинайин техника масу гъадагъну, ГъуштIил гъулаъ 8,7 миллион манатдин кьимат айи модульный ФАП дивну.
Образованиейин «Деврин мектеб» ва «Цифрйирин образованиейин аьтраф» проектар уьмриз кечирмиш апIури, Хив райондин ЧIиллихъ, Хирижв, ГъуштIил ва Гъвандикк гъуларин мектебарин бинайиинди цифрйирин образованиейин ва гуманитарный метлебнан «Точка роста» центрар ачмиш гъапIну. Райондин Ургъа, Гъванцил ва ГъуштIил гъуларин мектебариз бицIидар гъахуз 3 автобус жара гъапIну.
Райондин культурайин идар-йирин материалинна техникайин бина къайдайиз хпан бадали, 5,2 миллион манат харж дапIна. Библиотекйириъ айи китабарин фод артухъ апIбан бадали, 157894 агъзур манат жара гъапIну.
Райондин экономикайин биналу циркларикан саб — гъулан мяишат ву. Кьабул апIурайи серенжемарин натижайиъ райондин гъулан мяишатдин циркилра артмиш шула. 2022-пи йисан гъулан вари жюрейин мяишатариъ гьясил гъапIу сурсатнан уьмуми кьадарну 1,161 миллиард манат тяйин гъапIну: набататчивалин сурсатну — 631,5 миллион манат, хъа малдарвалин сурсатну — 530 миллион манат. 2021-пи йисандин улупбарихь тевиган, гъулан мяишатдин сурсатарин гьясиллувал 3,3%-дин цIиб гъабхьну.
Ярмет Ярметовди чан доклад дурхну ккудубкIбан кьяляхъ, сессияйиз уч духьнайидари дугъаз жюрбежюр суалар тувнийи. Сессияйиз адагънайи имбу месэлйирра гьял гъапIнийи.
