Мартдин 28-пи йигъан «Дагъустан» РИА-йин конференцйир гъахру залиъ Дагъустандин туризмдин ва халкьдин художествойин сяняаьткарваларин министр Эмин Мерданов республикайин махлукьатлу хабрарин дакьатарин вакиларихъди гюрюшмиш гъахьну.
Дугъу журналистариз Москвайиъ кIули гъубшу туризмдин ва хялар кьабул апIбан индустрияйин Вари халкьарин выставкайикан (МИТТ-2023), республикайиъ туристар кьабул апIуз гъахурайи гьязурлугваларикан ктибтнийи.
МИТТ-2023 выставкайикан улхури, Эмин Мердановди Дагъустандин стенддихьна 9 агъзуриинакьан инсан гъафиваликан, Урусатдин саки вари субъектарин агьалйирин ихь республикайихьна айи маракьлуваликан гъапнийи. Выставкайин дахилнаъди туризмдин цирклиъ аьлакьйир уьрхбан гьякьнаан Урусатдин субъектарихъди 6 йикьрар гъийитIнийи, Узбекистандин ва Турцияйин делегацйирихъди туризм артмиш апIбаз бахш дапIнайи гюрюшар кIули гъухнийи.
Дагъустан Республика туристар кьабул апIуз гьязур шулайиваликан улхури, Эмин Мердановди къайд гъапIганси, республикайиз гъюз ккуни туристарин кьадар республикайихьан кьабул апIуз шлударин кьадартIан артухъ ву. Думу ляхни инфраструктурайин ери за апIувал, гостиницйир ва хялар кьабул апIру хулар артухъ, гьацира игьтияжар гьуркIувалин ери за апIувал тIалаб апIура. Министри гъапиганси, туризм артмиш апIбаз инвестицйир лазим ву.
Министри экскурсйир гъахрударин арайиъ аттестация гъубхуваликанра, гидар хьуз ккунидарин аьгъюваларин дережайиканра ктибтнийи. «Дугъриди гъапиш, республикайиъ айи экскурсйир гъахрударин аьгъювалари узу мюгьтал гъапIну. Дурарин арайиъ бажаранлу инсанар гизаф айи, француз, инглис чIалариинди имтигьян тувдарра айи. Сар гид-таржумачийи Расул Гьямзатовдин шиир француз чIалнииндира кмиди гъурхний», – къайд гъапIну Эмин Мердановди.
Журналистари туристариз республикайин аьдатарикан жикъи мялуматар кайи бицIи дафтар гьязур апIбаканра суал тувнийи. Министри думу жюрейин дафтар гьязурди айиваликан, лап багарихьди дидин презентация шлуваликан гъапнийи. «Дафтар гьязур апIури гизаф вахт гъабхьну. Дидиъ вари терефар атIагну ккундийи. Лап багарихьди Миннацдин, муфтиятдин, жара динарин вакиларихъди серенжем дубхну, гьаму бицIи дафтар арайиз адабгъуз ккача», – къайд гъапIнийи министри.
Пресс-конференцияйин аьхириъ «Дагъустан» РИА-йин директор Мягьямед Мягьямедовди, республикайиъ туризм артмиш апIбан бадали, варитIан гизаф чалишмиш шулайи муниципалитетарин кIулиъ айидарин ччвурар дисувал ккун гъапIнийи. Министри, гьич зат дидригъди, Табасаран райондин глава Мягьямед Къурбановдин ччвур гъибиснийи ва аьхиримжи йисари райондиъ туризмдин цирклиъ хайлин хъуркьувалар гъадагънайиваликан гъапнийи.
