Мартдин 29-пи йигъан Дагъустандин Глава Сергей Меликов Республикайин призывдин комиссйирин вакиларихъди гюрюшмиш гъахьну. Региондин кIулиъ айири гъубшу йисандин чвлин призывдин натижйирикан мялуматар тувну ва жигьилариз дявдин гъуллугъназ дих апIбан хьадукран призывдин ляхин гъабхбан теклифар дивну.
Ухьуз мялум вуйиси, гьар йисан Урусатдиъ, апрелин 1-пи йигълан ккебгъну, июлин 15-пи йигъазкьан призывдин кампания кIули гъябгъюру. Армияйиъ гъуллугъ апIуз 18 йислан 27 йис’ина яшар духьнайи жигьилариз дих апIуру. Повестка хилиз рубкьбан кьяляхъ, жигьил бай военкоматдиз дуфну ккунду. Душваъ медицинайин комиссияйи жигьилин сагъламвал ахтармиш апIуру. Гьаддин кьяляхъ призывникар армияйиъ гъуллугъ апIру йишвариз жара апIуру. Армияйиъ гъуллугъ апIбан вахт 12 ваз ву.
Сергей Меликовди гюрюшдиз уч духьнайидариз Дагъустандиъ хьадукран призывдин кампания тешкиллувалиинди ва заан ери ади кIули дубхну ккуниваликан гъапну. Думу Урусатдин Президент Владимир Путиндин табшуругъ ва РФ-дин оборонайин министерствойин тIалаб ву. «Призывдин кампанияйин ляхнихьна жавабдарвалиинди янашмиш хьувал ккун апIураза. Жигьил баярин гъавриъ духьну, дурарихьна инсанвалиинди илтIикIай», – гъапну региондин кIулиъ айири.
Дагъустандин Главайи серенжемдин иштиракчйирикан жямяаьтлугъ тешкилатарин вакиларихъди, яшлу касарихъди, ветеранарихъди, спортсменарихъди, жямяаьтлугъдин арайиъ гьюрмат айи касараихъди гюрюшмиш хьувал, жигьилар армияйиъ гъабхру гъуллугънахьна жалб апIбан ляхин гъабхувал ккун гъапIну.
Гюрюшдиъ РД-йин военный комиссар Дайтбег Мустафаевди къайд гъапIганси, Мягьячгъалайиъ, шагьрарин ва районарин призывдин комиссйирин председателар, военный комиссарар, ватандашар призывдихьна ва дявдин гъуллугънахьна гьязур апIру отделенйирин кIулиъ айидар, терапевт-духтрар, муниципалитетарин призывдин комиссйирин секретарар иштирак духьну, методикайин теклифар дивбан серенжем кIули гъубшну. Думу серенжемдиъ гьаму йисан апрелин-июлин вазариъ призыв тешкил апIбан саб вуйи методика кьабул гъапIну.
Дугъу гьацира, Дагъустандин Главайиз чухсагъул дупну, шагьрарин ва районарин кIулиъ айидарикан призывдин кампания гъабхбаъ кюмек апIувал ккун гъапIнийи.
Сергей Меликовди армияйиъ 12 вазлиъ гъуллугъ апIуз гъуху баяр хусуси метлеб айи дявдин операция гъябгъюрайи йишваз гьадраъруваликан, думу месэла ижми гюзчиваликк ккайиваликан гъапнийи. Дугъу уч духьнайидарикан гьяфтайиъ саб ражари призывдин кампанияйин натижйирикан чаз мялуматар тувувал ккун гъапIнийи.
