Инвестицйир жалб апIуз гъулай шартIар айи йишв аьгъю апIбан бадали, 2022-пи йисан республикайин муниципалитетарин арайиъ кIули гъубху конкурсдиъ Табасаран район ва Дербент шагьур сабпи йишваз удучIвну.
Табасаран райондин ва Дербент шагьрин ерли гьюкмари алверчивал артмиш апIуз артухъси мумкинвалар арайиз хура.
Улихьна йигъари Дагъустандин Глава Сергей Меликов Табасаран райондин кIулиъ айи Мягьямед Къурбановдихъди гюрюшмиш гъахьну. Думу гюрюшдиъ РД-йин Главайин Халкьдин Собраниейиъ айи вакил Нюсрет Уьмаровдира иштирак’вал гъапIнийи.
Гюрюшдиъ Сергей Меликовди Мягьямед Къурбановдихъди Таба-саран райондиъ айи яшайишдинна экономикайин аьгьвалатнакан сюгьбат гъубхнийи.
Мягьямед Къурба-новди 2022-пи йисан райондиъ кIули духьнайи ляхнарикан, гъазанмиш дапIнайи хъуркьуваларикан мялуматар тувнийи. 2022-пи йисан Табасаран райондиъ налогарин ва налогарин дару 185 миллион манат гъазанжар уч гъапIну, тялукь вахтна финансарин вари дакьатарин гьисабнаан асас капитализ гъафи инвестицйири 1,2 миллиард манаттIан артухъ тяйин гъапIну.
Сергей Меликовди, Табасаран район инвес-тицйир жалб апIуз гъулай шартIар айи районарин арайиъ сабпи йишваз удубчIвбахъди тебрик дапIну, муниципалитетдин главайиз ва администрацияйин коллективдиз чухсагъул мялум гъапIну. Дугъу райондин агьалйиризра игитар тербияламиш апIбаз чухсагъул гъапнийи.
Гюрюшдиъ 2023-пи йисан райондин улихь дийигънайи месэлйирра гъитIирккнийи. Дурарин арайиъ 5 месэла артухъси фикир тIалаб апIрудар вуйи: Дербент – Хючна – Хив рякъ дибдиан рас апIувал, «Къужник – Хючна» шид зигувалин проектдин кьюбпи пай уьмриз кечирмиш апIувал, даргъурайи мектебарин, «Табасаранское» ГУП-дин ва Сардаровдин ччвурнахъ хъайи ГУП-дин жиларин месэлйир, Хючна гъулаъ поликлиника тикмиш апIувал.
Гюрюшдин кьяляхъ Сергей Меликовди региондин правительствойиз ва тялукь министерствйириз гюрюшдиъ гъитIиркку месэлйир гьял апIбан табшуругъар тувнийи. Гьар йигъандин месэлйир тамам апIбаъ гъавриъ хьувализ ва кюмек тувбаз, Мягьямед Къурбановди Сергей Ме-ликовдиз райондин агьалйирин терефнаан аьхю чухсагъул мялум гъапIнийи.
Гьякьикьатдиъра, аьхиримжи йисари Табасаран район гьяракатниинди артмиш шула. Му аьхю хъуркьувал гъадабгъувалихъди тебрик дапIну, учу Табасаран райондин глава Мягьямед Къурбановдикан къайд дапIнайи месэлайин гьякьнаан чан фикрар ачухъ апIуб ккун гъапIнийча.
«Учу, райондиз инвес-тицйир жалб апIбан бадали, лазим вуйи шартIар арайиз хувалин месэлйириз асас фикир туврача. Администрацияйин гъуллугъчйири инвесторарихъди, меценатарихъди, яна пулин гизаф дакьатар айи инсанарихъди, гюрюшар гъахури шулу. Эгер гьял апIуз читин вуйи месэл-йир арайиз гъафиш, дурар сатIиди гьял апIуз мумкинвал абгурача.
Ич ачухъ’вал тикилишчивалин ляхнар апIбан, дибдиан расвалин ляхнар кIули гъахбан конкурс мялум апIруган рябкъюру. Думу севдигарвалариъ ачухъвал, кучIал адрувал рябкъюрайиган, тикилишчивалин 5-6 тешкилатди конкурсдиъ иштирак хьуз аьрзйир тувру.
Мидланра савайи, муниципалитетдиъ объектариин кIули гъахру ляхнарин ери ахтармиш апIувал гьарган йиз гюзчиваликк уьбхюраза.
Гьаци вуйиган, райондиз гележегдиъ артмиш хьуз ужудар мумкинвалар айивалик умуд киврача», – гъапнийи Мягьямед Къубановди.
