2023-пи йисан 1-пи апрелихъан башламиш дапIну, хьадукран призыв ккебгъну. Гьаму йисан Дагъустандиан армияйиъ чпин буржи тамам апIуз 4 агъзуриинакьан жигьилар гъягъиди. Дидин гьякьнаан «Дагъустан» РИА-йиъ кIули гъубшу пресс-конференцияйиъ РД-йин военный комиссар Дайтбег Мустафаевди мялум гъапIну.
Ккебгънайи призывдикан улхуз хъюгъяйиз, региондин военный комиссари 2022-пи йисандин чвлин призывдин натижйирикан ктибтнийи. «Ихь республикайиз 3,5 агъзуриинакьан жигьилар армияйиз гьаъбан план дивнайи. Военный комиссариатарин гъуллугъчйирин, муниципальный образованйирин главйирин, айтIан ляхнарин министерствойин кюмекниинди республикайин улихь дивнайи месэла вахтниинди ва заан ери ади тама апIуз мумкинвал гъабхьнийи», – къайд гъапIну военный комиссари.
Дайтбег Мустафаевдин гафариинди, чвлин призывдин кампанияйин вахтна армияйиккан кIул ккадабгъуз ккуни 220-тIан артухъ ватандашар административ жавабдарвалихъна гъахнийи, 40-тIан артухъ ватандашарин гьякьнаан документар судариз тувнийи.
Хьадукран призывдин кампания-йикан улхури, Дайтбег Мустафаевди къайд гъапIганси, 2023-пи йисан хьадукран призыв 1-пи апрелилан 15-пи июлизкьан давам хьибди.
Мартдин 29-пи йигъан Республикайин призывдин комиссияйин председатель, РД-йин Глава Сергей Меликовдин регьберваликкди муниципальный районарин призывдин комиссйирин председателарихъди, шагьрарин ва районарин военный комиссарарихъди, терапевт духтрарихъди хьадукран призывдин кампания ужуди гъабхбан гьякьнаан сатIи вуйи ляхнин методика арайиз хувализ бахш дапIнайи гюрюшар кIули гъушну.
«Гьаму йисан призывдин комиссйириз 45 агъзуртIан артухъ жигьил баяриз дих апIиди. Генеральный штабди ва кьибла военный округдин штабди республикайин улихь дивнайи план 4 агъзуриинакьан призывникар ву. Призывникарин кьадар артухъ апIувал РФ-дин Яракьлу кьуватарин кьадар 1,5 миллиондиина артухъ апIуз адабгънайи къарарихъди аьлакьалу ву», – гъапнийи военный комиссари.
Республикайин призывникар уч шлу пункт ва районарин пунктар призывдин комиссия гъабхуз гьязурди а, ляхин ккебгъна, вари лазим вуйи шартIар яратмиш дапIна. Дайтбег Мустафаевдин гафариинди, транспортдин компанйирихъди йикьрар йитIна, призывникар армияйиз гьаъбахъди аьлакьалу читинвалар хьидар. Жигьил эскрарин сабпи десте 15-пи апрелихъан рякъюъ тIапIди.
Дайтбег Мустафаевди армияйиз гъахурайи жигьил баяр 2022-пи йисан РФ-дин дахилназ гъадагъу регионариз – ДНР-ин, ЛНР-ин, Херсонский ва Запорожский областарин аьтрафариина – гъахури адрувалин гьякьнаан кьатI’и жаваб тувнийи.
Армияйиъ гъуллугъ апIру вахтра дигиш дапIнадар, улихьдиси 12 ваз гъузра. Армияйиъ гъуллугъ апIувал ккудубкIу вари жигьилар, РФ-дин оборонайин министерствойихъди вуйи контрактдиин къул гъизигдар ктарди, чпин хулариз гьаъди.
Республикайин СМИ-йин журналистарин суалариз жаваб туври, Дагъустандин военный комиссари контрактдиинди военный гъуллугъназ гъягъбаканра ктибтнийи.
«Къанундиз асас вуди, контрактдиинди вуйи гъуллугъназ 18 йислан 60 йис’ина яш дубхьнайи, хъа гъуллугъназ гъягъюрайир армияйиъ лазим вуйи пишейин эйси вуш, 65 йис’инакьан, ватандашар гъадагъуру. Контрактдин варитIан цIиб вуйи вахт сад йис ву. Улихьди контрактдиинди гъуллугъ апIуз ккуни ихь баяр Астрахандиз гъягъюри гъахьнуш, гьамус думу пункт Мягьячгъалайиъра ачмиш апIуз ихтияр тувна. Саб вазлилан, вари тIалабар тамам дапIну, думу пункт ихь республикайиъра либхуз хъюбгъди. Кьюд йигъандин арайиъ медицинайин комиссияйи сагъламвал ва жандин удукьувалар ахтармиш дапIну, шубудпи йигъан кьушмарин командующийдин приказ удубчIвуру ва ватандаш контрактдиин къул зигуз кьушмарин частназ гьаъру. Эгер контрактдиинди гъуллугъ апIуз ккунидар аш, военный комиссариатариз илтIикIай. Контрактдиин къул гъизигу ватандашдиз оборонайин министерствойи дишлади (вазлин маважиб ктарди) 195 агъзуртIан цIиб дарди пул тувру. Сад йислан контракт ккудубкIиган, ватандашди хъана контрактдиинди гъуллугъ апIуз аьрза гъибикIиш, дугъаз хъана 195 агъзур манат тувру. Дявдин операция гъябгъюрайи йишваъ гъуллугъ апIурайидариз гьар вазлиъ 200 агъзуртIан цIиб дарди маважиб тувра, душмандин дагъитмиш гъапIу гьарсаб машиндихъанра пешкеш вуди пул тувра. Ляхин хътарди хулаъ дахъну гъузайиз, ихь жиларихьан гъазанмишра апIуз, Ватандин улихь чпин буржира тамам апIуз шулу», – къайд гъапIнийи Дайтбег Мустафаевди.
Дугъан гафариинди, хусуси метлеб айи дявдин операция гъябгъюрайивализ дилигди, оборонайин минис-терствойин урхбан идарйириз урхуз гъягъюз ккунидарин кьадарра цIиб дубхьнадар.
