Апрелин 11-пи йигъан Табасаран райондин глава Мягьямед Къурбановдин регьберваликкди райондин админис-трацияйин гъуллугъчйирин совещание кIули гъубшнийи.

 

Совещаниейиъ райондин главайи къайд гъапIганси, ихь ватанагьли, профессор Зейдуллагь Юзбеговдин ччвурнахъ гьар йисан Хючнаарин 1-пи нумрайин многопрофильный лицейдиъ математикайиан тешкил апIурайи олимпиадайин муниципальный пай цци 24-пи апрелиъ кIули гъябгъиди. Олимпиада гъабхру йигъан Хючназ, Зейдуллагь Юзбегов кIулиъ ади, МГУ-йин мялимарин делегация гъюбанди ву.

 

«Олимпиада ачухъди ва гьякьлувалиинди кIули дубхну ккунду. Гъубшу йисанси, ццира олимпиадайин гъалибчйириз ва дурарин мялимариз пулсузди 3 йигъаз Москвайиз гъягъювал тешкил апIиди», – гъапну райондин кIулиъ айири.