2013-пи йисхъан мина СтIал Сулейман райондиъ гъулан мяишатдин сурсат гьясил апIурайи «Полоса» ООО-йин хиликк саки 4 агъзуркьан гектарин жилар кка. Гьясил апIурайи гъулан мяишатдин сурсатар, янаки йимишарин ва аьмлюхъярин багълариъ уч гъапIу ужуб бегьер уьбхбан бадали, му агрофирма, деврин тIалабариз жаваб тувру инфраструктурайихъди тямин дапIна.

 

Къайд апIуб лазим вуки, агрофирмайин гизаф бегьер хру багълариъ ишлетмиш апIурайи технологйирин кюмекниинди 2030-пи йисаз душваъ уч апIру вичарин бегьер 50 агъзур тоннайихьна, хъа аьмлюхъярин бегьер – 3 агъзурна 500 тоннайихьна за апIувал планламиш дапIна.

Гъябгъюрайи йисан хьадукран вазариъ мяишатдин лап гизаф бегьер хру жихрин багъ, хъанара 32 гектариъсан гъелемар кивну, яркьу гъапIну, ва гъийин йигъаз дидин кьадар 52 гектар дубхьна кIури, республикайин гъулан мяишатдин ва ипIру-убхъру сурсатарин министерствойин пресс-гъуллугънан кIулиъ айи Мягьямед Аьбдуллаевди мялум гъапIну.

Дугъу тувнайи мялуматариинди, му жюрейин багъ кивбан бадали, саб гектариз удучIвурайи харжарин кьадар 2 миллион манаттIан артухъ шула.

«Гьаму йисан республикайиъ 1 агъзуртIан артухъ гектарариъ йимишарин багълар кивуз планламиш дапIна. Гьадму гьисабнаан 250 гектариъ киврудар гизаф бегьер хру багъар ву. Дарпиди гъитуз шулдар, гьамусяаьт республикайиъ йимишарин кьаби духьнайи гьарар айи хайлин йисарин багълар цIийи алаура. Мидланра гъайри, мянфяаьт ктарди, цIибди бегьер хурайи багъларизра кьюбпи уьмур тувра.
Гъийин йигъаз республикайиъ 3 агъзурна 900 гектариъ гизаф бегьер хру багълар кивнайи. Гьадрарикан 830 гектариъ кивнайидар лап гизаф бегьер хру, гил айи йимишарин багълар ву», – аьлава гъапIну Мягьямед Аьбдуллаевди.
Къайд апIуз ккундузузки, Европайин гьюкуматарин арайиъ аьмлюхъярин варитIан зурба багъ «Полоса» ООО-йин мяишатдиъ а. Сач дидин аьхюшин 1,1 агъзур гектар вуйиш, цци думу 2 агъзур гектариинакьан яркьу апIуз планламиш дапIна.
Мяишатдин проектдин ляхнар 2030-пи йисан ккудукIуз планламиш дапIна, хъа дина жалб апIру инвестицйирин кьадар 5 миллиардна 200 миллион манат ву.