Гъябгъюрайи йисан Дагъустандиъ гьюкуматдин саб вуйи имтигьян (ЕГЭ) 12,5 агъзуртIан артухъ выпускникари, хъа 9-пи классдин кьяляхъ вуйи натижа йивбан аттестация 40 агъзур урхурайидари тувди.
17-пи апрелиъ РД-йин Глава Сергей Меликовди 2023-пи йисан Дагъустандиъ ГИА-йихьна гьязур хьпан ва думу гъабхбан месэлйириз бахш дапIнайи совещание кIули гъубхнийи.
Совещаниейиъ РД-йин образованиейин ва илмин министр Ягь’я Бучаевди къайд гъапIганси, аьхиримжи йисари Дагъустандиъ информатикайиан ЕГЭ тувуз ккунидарин кьадар артухъ гъабхьну. Мидланра гъайри, чпиан варитIан гизаф ЕГЭ туврайи предметар биология, обществознание ва химия ву. Му предметар гьарсар шубурпи выпускникди ктагъура.
«Гъябгъюрайи йисан информатикайиан ЕГЭ туврайи 1035 выпускник гьисабназ гъадагъна. Гъубшу йисан тялукь вахтнахь тевиган, му улупбар 21 процентдин артухъди ву. 2022-пи йисан му предметдиан 855 выпускникди ЕГЭ тувнийи. Мидланра гъайри, профильный математика ва тарихнан дарс 20 процент выпускникари, информатика – 9 процент выпускникари, физика ва инглис чIал – 6 процент выпускникари, литература – 3 процент выпускникари, геог-рафия – 1 процент выпускникари ктабгъура», – гъапну Ягь’я Бучаевди.
Сергей Меликовди совещаниейиъ туву мялуматариинди, ккудушу йисари ГИА ачухъди ва къайда чIур дарапIди республикайин бязи муниципалитетариътIан гъубхундар. «Муниципальный образованйирин кIулиъ айидарикан дикъатлу фикир тувуб ккун апIураза – гьюкуматдин натижа йивбан аьхиримжи имтигьнар низам-къайда чIур дарапIди кIули гъахувалихъан ва дурар тешкил апIувалихъан кIул’инди жавабдарвал гъабхурайидар учву вучва», – къайд гъапIнийи республикайин Главайи.
Образованиейин ва илимдин цирклиъ гюзчивал гъабхру федеральный гъуллугънан кIулиъ айи Анзор Музаевра совещаниейиъ иштирак гъахьнийи. Дугъан гафариинди, 2022-пи йисан ЕГЭ тувувалиан регионарин сиягьдиъ Дагъустан 10 пунктнан улихь гьудучIвну.
«Гъубшу йисарихь тевиган, 2022-пи йисан Дагъустандиъ ЕГЭ тешкил апIбаъ хайлин дигиш’валар гъахьну. «Горячий линияйиз» ЕГЭ тувбан къайда дюрюбхювалин дюшюшарикан зенгар ва аьрзйир апIувал, техника дилибхувалин дюшюшар гъахьундар», – гъапнийи Анзор Музаевди.
Аьхиримжи аттестация тувру вахтна бицIидарин саламатвал ва архаинвал тямин апIбан бадали, Сергей Меликовди РД-йин Минздравдиз медицинайин идарйирин ляхниъ дигиш’валар тIауб табшурмиш гъапIну.
«Выпускникар имтигьнарихьна гьязур шулайи вахтна, дурариз айи аьгъюваларилан гъайри, чиб психологияйин терефнаанра экзамен тувуз гьязур апIували аьхю роль уйнамиш апIура», – къайд гъапIнийи региондин Главайи.
