Апрелин 19-пи йигъан Дагъустан Республикайин Глава Сергей Меликов РД-йин Халкьдин Собраниейин депутатарин улихь Послание хьади удучIвну гъулхну.
Чан Послание Сергей Меликовди Урусатдин Федерацияйи гъабхурайи хусуси метлеб айи дявдин операцияйилан, ригъ алабхъру терефнан уьлкйири ва США-йи Урусатдиин вари жюрейин санкцйир илитIнайи, думу уьлкйири Украинайиз гьамусдин деврин аьхю кьадар яракь хътапIурайи вахтна ихь уьлкейиъ ва республикайиъ арайиз дуфнайи аьгьвалатнакан улхбалан ккебгънийи. Дугъу къайд гъапIганси, СВО-йиъ иштирак шулайи агъзрариинди дагъустанлуйир орденариинди ва медалариинди лишанлу дапIна. Гьяйифки, гъийихдарра гизаф а. Республикайин кIулиъ айири, саб дакьикьайиъ ккебехъну дийигъну, гъийихдарин гьюрмат уьбхювал ккун гъапIнийи.
Дагъустанди СВО гъябгъюрайи йишваъ айи ихь эскрариз рягьимлувалин кюмекар хътаура. «СатIиди гьисаб гъапIиш, Дагъустандиан СВО-йин зонайиз 5 агъзурна 180 тонна рягьимлувалин кюмек хътапIну, хъа диндин ва рягьимлувалин тешкилатарин кюмекра гьисаб гъапIиш, 8,5 агъзуртIан артухъ тонна. Думу улупуб жара регионарихь тевиш, Дагъустан улихь хьайидарин улупбарин жергейиъ а», – мялум гъапIну региондин кIулиъ айири.
Сергей Меликовди республикайиъ гъулан мяишатдин сурсатар гьясил апIурайиваликан, амма тартиб апIувалин дережа харжиб вуйиваликан гъапну.
Дугъу гьацира гьаму йисандин аьхириз муниципальный образованйирин сяргьятарин гьякьнаан улупбар ЕГРН-диъ тIаъну ккудубкIну ккуниваликан къайд гъапIнийи.
Республикайин тикилишчивалин циркликан улхури, Сергей Меликовди аьхю хулар тикмиш апIурайидарин гьярисвал, инсанариз ва гьюкмин органариз кучIлар апIувал чIяаьн вуйиваликан гъапнийи.
Дугъан гафариинди, тикилишчивалин министерствойин ляхин лап асккан дережайиъ а.
«Урусатдин Федерацияйиъ Да-гъустан 1-пи группайин инвалидариз, сакьат бицIидар айи хизанариз хулар масу гъадагъуз субсидйир туву саб субъект ву. Гъубшу йисан 114 хизандиз кюмек тувну. Гьаму йисанра гъубшу йисанси гьадму кьадар пул жара апIиди», – гъапнийи республикайин Главайи.
Дугъу гьацира ЖКХ-йин циркил лап читин гьялнаъ айиваликан гъапнийи. Гьаддихъди сабси, швнуд-сад йисан чвлинна кьюрдун манишин тувру вахтназ паспорт гъадабгъуз шули адру Дагъустандин Огни шагьурра кIваин гъапIнийи.
Чан Посланиейиъ Сергей Меликовди гъябгъюрайи йисандин бязи планариканра ктибтнийи. Гьаци, 2023-пи йисан Дагъустандиъ бицIидарин 24 багъ ва 13 мектеб ачмиш, 141 дарамат дибдиан рас апIиди – му метлебариз 3,6 миллиард манат жара дапIна.
Цци бицIи ва кьялан бизнесдин цирклизра 500 миллион манат жара апIиди. Республикайиъ бицIи ва кьялан бизнесдиъ 315 агъзур кас лихура. Дурари Дагъустандин валовый сурсатнан шубуб пайнакан саб пай арайиз хура. Чпин кIул’индии ляхнихъди тямин апIрударин кьадарра артухъ шула. Гъи дурарин сан 220 агъзур касдиина удубчIвна.
Сергей Меликовди къайд гъапIганси, гъубшу йисан республикайиъ 750 километр рякъярра рас дапIна.
Сергей Меликовди чан Посланиейиъ РД-йин спортдин министерствойин ляхниз ужуб кьимат тувнийи, хъа образованиейин ва илимдин министерствойин, сагъламвал уьбхбан министерствойин, РД-йин Госжилинспекцияйин ляхнариъ айи нукьсанвалар къайд гъапIнийи.
Дагъустандин Главайи Жямяаьтлугъ палатайин ляхинра тянкьид гъапIну. «Жямяаьтлугъ палатайиз цIийи вакилар гъядагъруган, майилвалин тереф уьбхюри, танишвалин аьлакьйириин асас духьну, гъядягъну ккундар», – гъапнийи Сергей Меликовди.
Региондин кIулиъ айири СВО-йин иштиракчйир вуйи депутат Расим Гьяжиагъаевдин ва Аьбдуллагь Мягьямедовдин ччвурар имбудариз чешне вуди гъидиснийи.
