Украинайиъ кIули гъябгъюрайи хусуси метлеб айи дявдин операцияйин иштиракчйир ва дурарин кюлфетар транспортдин налог тувбахьан азад апIиди.
Къанундин тялукь проект РД-йин Халкьдин Собраниейин депутатари 25-пи апрелиъ кIули гъубшу сессияйиъ кьюбпи аьхиримжи урхбаъ кьабул гъапIну.
ЦIийи къанунди транспортдин налогдихьан СВО-йин вари иштиракчйир азад апIиди, гьам военный гъуллугъназ мобилизацияйин дахилнаъди душнайидар, гьамсан жвуван хушниинди хусуси метлеб айи дявдин операцияйиъ иштирак шулайидар, гьам военный контракт гъийибтIдар, хъа гьацира дурарин кюлфетар. Къанундин гьяракатнакк 150-риина гьяйвнарин кьувватариз барабар двигатель айи машинар ккахьра.
Гьаму къанунди транспортдин налогдихьан Афган дявдин ветеранарра ва дурарин хизанарин сарсан вакилра – сарпирди тялукь аьрза налогарин органариз тувур – азад апIиди.
