Улихьна йигъари Урусатдин оборонайин министерствойин пресс-гъуллугъну, аьдат дубхьнайиганси, хусуси метлеб айи дявдин операцияйиъ иштирак шулайи эскрарин игитваликан нубатнан мялумат тувну. «Гвардияйин ефрейтор Акиф Шябановди, Урусатдин десантникарин батальондин тактикайин дестейин дахилнаъди Украинайин миллетчйирихьан азад дапIнайи саб гъул уьбхюри, чан улихь дивнайи дявдин месэла тамам апIурайи. Душманди Урусатдин кьушмар терг апIбан ва гъулан ватандаш инфраструктурайиз зарар тувбан бадали, тIуркIру яракьар айи пилот адру тIирхру аппаратар деетурайи, гьацира артиллерияйин яракьдиан сикин дарди йивбар гъахурайи. Акиф Шябановди, душманди уьлюбхнайи гюллдин цIиз дилигди, чпин десте ерлемиш дубхьнайи йишваъ завун аьтраф гюзчиваликк уьбхюрайи. Рота айи йишвахьна тIибхру аппарат гъюрайивал дябкъну, чан уьмриз хатIа айивализ дилигди, Акифди радиойинна электрондин женг гъабхру (РЭБ) оборудованиейин кюмекниинди операторинна дрондин арайиъ айи манзилнан аьлакьа чIур дапIну, тIибхру аппарат ихь эскрарихьан хатIасуз манзилнаъ жилиин дубсуз гъитну. Душмандин тIибхру аппарат хатIасуз апIбан кьяляхъ, ВДВ-йин дестйири чпи ерлешмиш духьнайи йишв гьяракатниинди гьюдюхну. ЦIиб вахтналан миллетчйири, ихь эскрар улдучIвну гъушу йишв’ина артиллерияйин цIа уьлюбхнийи.
Гвардияйин ефрейтор Акиф Шябановдин пишекарвали душман разведка апIуз даршлуси дерккну, украинлуйирин артиллерия ягъламиш хьуз гъитну ва гьаддиинди чав гъуллугъ апIурайи десте терг апIбахьан гъюбхну ва дидиз улихь дивнайи месэла тамам апIуз мумкинвал тувну», – дупна думу мялуматнаъ.
Акиф Шябанов (шиклиъ)Табасаран райондин Жулжагъ гъулан агьали вуйивал аьгъю дапIну, учу Жулжагъ гъулан мектебдиъ балин классдин руководитель вуди гъахьи Аьбдурашид Уьмаровдихьна илтIикIунча. Дугъахъди гъубху сюгьбат исихъ туврача.
«Акиф Эседуллагь ва Нурият Шябановарин хизандиъ аьхюну бай ву. Узу 5-пи классдиан мина мектеб ккудубкIайизкьан Акифдин классдин руководитель вуди гъахьунза. Учв бай кьялан кьиматариз урхрур ву-йишра, чаз туву табшуругъ фикирлуди кIулиз адабгърур, жвуву туву гаф тамам апIрур, дустарихъди гьаммишан албагну гъузрур вуйи. Лазим гъабхьиган гьацдар баярикан игитарра шулу.
Мектеб ккудубкIбан кьяляхъ думу контрактдиинди дявдин гъуллугъназ гъушнийи. Урусатди хусуси метлеб айи дявдин операция ккебгъхъан мина Акиф Шябанов СВО-йиъ иштирак шула. Гьаму вахтнан арайиъ дугъаз швнуб-сабан зийнар гъахьну. Зийнар сагъ апIру вахтнаъ гъулазра гъафну. Гьамус шубубпи ражари СВО-йин зонайиз душна.
Гьамцир кьягьял вердиш апIбак йизра пай кайивалиин гизаф шад вуза. Гъит ихь баяр, гъалибвал гъадабгъну, игитарси чпин хулариз кьяляхъ гъюри», – гъапнийи Аьбдурашид Уьмаровди.
