Улихьна йигъари Каспийск шагьриъ Урусатдин Игит В.Казанцевдин ччвурнахъ хъайи Каспийскдин образованиейин центр – 15-пи нумрайин мектебдиъ Гъалибвалин 78 йис хьпаз бахш вуйи«Аьхю Гъалибвалин наслар» конкурсдин натижйир гъивну.Дагъустан Республикайин образованиейинна илимдин министерствойи тешкил гъапIу думу конкурс республикайин мялимарин, мектебариъ урхурайидаринна студентарин арайиъ швнуб-саб номинацияйиан кIули гъубшну.
Конкурсдин «Классдин сяаьт» номинацияйиъ Хив райондин Ляхлаарин кьялан мектебдин директорин заместитель Аьшурбег Аьшуровра (шиклиъ) иштирак гъахьну.
Комиссияйи му номинацияйиз республикайин жюрбежюр районариан мялимари хъадаънайи 14 ляхнаригъян варитIан ужубси ихь ватанагьлийин ляхин гьисаб гъапIнийи ва дугъаз 1-пи йишв тувнийи. Хъа апрелин аьхирариъ конкурсдин натижйир йивбан ва гъалибчйириз пешкешар тувбан серенжем Каспийскдиъ кIули гъубшну. Думуган, комиссияйин вакилари Аьшурбег Аьшуровдихьан дарсназ мициб девлетлу, мяналу материал наънан вуш, ктибтуб ккун гъапIнийи. Варибдикан хъайи-хъайибси чав, конкурсдин гъалибчийи, ктибтура:
«Республикайин образованиейинна илимдин министерствойи конкурс тешкил дапIнайиб мялум гъабхьиган, улупнайи темайиан «Классдин сяаьт» дарсназ узу сценарий гьязур гъапIнийза ва 19-пи мартдиъ конкурсдиз хътапIнийза.
Ватандин Аьхю дявдиз Хив райондиан 1800 кас гъушну. Дурарикан шил адарди гъудургдарин кьадар 1100 кас вуйи. Ич мектебдиъ шилнаъди лицрударин десте (ТОКС) айич. Райондиан Ватандин Аьхю дявдиъ иштирак шули гъудургдарин гьякьнаан хайлин ляхин дубхнача. Урусатдин Кьялан ва оборонайин министерствойин архиварихъди лихури, 1970-80-пи йисари хайлиндарин накьвар наан аш гъагунча. Думу ляхин гъира давам шули ими.
Узу конкурсдиз хътапIу сценарий учу мектебдиъ, шил адарди гъудургу фронтовикар агури, дубхнайи ляхнин бинайиин гьязур дапIнайиб вуйиз. Дидин метлеб – гъийин аргъаж шулайи насларин юкIвариъ ватанперварвалин гьиссар ачмиш апIуб, Ватандин Аьхю дявдин йисари фици ихь ватанагьли-йири, Ватан бадали чпин жанар гьяйиф дарапIди, зегьмет зигури гъахьнуш, гьаци гъира Урусатди Украинайин аьт-рафариин гъабхурайи хусуси метлеб айи дявдин операцияйиъ ихь баяр, ватанпервервал улупури, женгариъ иштирак шулайивал улупуб вуйи», – аьлавагъапIнуАьшурбег Аьшуровди.
