2023-пи йисан 9-пи майдиъ 27 миллионтIан артухъ инсанарин уьмрар гъуху Ватандин Аьхю дявдиъ гъалибвал гъадабгъну 78 йис тамам хьувалра къайд гъапIну. Ухьу лап кIваантIан ихь игитарин – фронтдиъ Ватандин азадвал бадали жанар тувдарин, далу терефнаъ зегьмет гъизигдарин гьюрмат уьбхюрахьа. Душмандихьан Аьхю Гъалибвал тадабгъдариинди, чпин уьмрар тувну, ухьуз ислягьвал гъазанмиш гъапIдариинди, дявдин цIин ялавнаан кьягьяларси удучIвну, кьяляхъ гъафидариинди дамагъ апIурахьа.

 

 

Дюн’яйиъ гьамкьан инсанарин уьмрар гъуху дявдин кьяляхъ, цIийи дявдин цIа кчIибгуз саринра фикриз дяргъюр кIури, хиял шуйи. Амма уьмри жара рякъяр улупура. Гьадмугандин миллетчйирин чIуру кьастар кIулиз адагъуз дархьидарин гьамусдин нас-лари ислягь халкьариз сикинвал гъибтрадар.

Ватандин Аьхю дявдин йисариси, гъира Урусатди хусуси метлеб айи дявдин операция гъабхурайи йишваъ агъзрариинди дагъустанлуйири Ватандин маракьар уьрхюра. Гьадрарин цIарнаъди аьдати табасаран баяри ихь халкьдин ад за апIура. Урусатдин гьарсар ватандашдиз Урусатдин Игит, генерал-полковник Рустам Мурадовдин, Урусатдин Игит, генерал-лейтенант Эседуллагь Абачевдин, Урусатдин Игит, капитан Исрафил Мягьямедовдин, Урусатдиъ варитIан жигьил Урусатдин Игит, аьхюну лейтенант Руслан Къурбановдин ччвурар машгьур духьна.

Гъалибвалин Аьхю машквар къайд апIру йигъарира кмиди душман даахнадар. Дявдин экспертари туврайи мялуматариинди, Украинайин миллетчйири Урусатдин кьялан аьтрафариина дронар деетну. Амма дурарихьан ихь машкврин йигъ чIур апIуз гъабхьундар. Думу терефнаан деетнайи йицIбариинди дронар ПВО-йи вари терг гъапIну.

Урусатдин вари агьалйир хусуси метлеб айи дявдин операция ккудубкIбаз ккилигура. Амма гьеле думу операция ккудубкIруси дар. Ригъ алабхъру терефнан уьлкйири, США-йи Урусатдиз чпин аьксивал ачухъди улупура, душман гъагъи яракьарихъди тямин апIура.

Амма дюзвал уьбхру уьлке гьаммишан гъалиб шулу. Ихь уьлкейин тарихнаъ хъана гъалибвалин йигъар шлувалик умуд киврухьа.