9-пи майдиъ Гъалибвалин 78-пи йис Каспийск шагьриъ парад тешкил апIбиинди къаршуламиш гъапIну.
Гъалибвалин Йигъаз бахш дапIнайи варитIан асас серенжемдиъ Дагъустандин Глава Сергей Меликов, республикайин Правительствойин председатель Аьбдулмуслим Аьбдулмуслимов, РД-йин Халкьдин Собраниейин председатель Заур Аскендеров, республикайин гьюкуматдин секретарь Мягьямед-Султан Мягьямедов, Ватандин Аьхю дявдин ветеранар, гьадму гьисабнаъди 99 йисандин яшариъ айи Ибрагьим-Паша Садыкьовра ва хъана жарадарра айи.
Каспийскдиъ парад, аьдат вуйиганси, кремлин курантар гъивган, Каспийскдиъ айи Уьру пайдагъ, Каспийин флотилияйин офицерари Урусатдин ва Гъалибвалин пайдгъар хьади удучIвбиинди ачмиш гъапIну.
Шагьрин кьялан майдандиина уч духьнайидар душв’ин ерлешмиш дапIнайи аьхю экрандиантина Москвайин Уьру майдандиин Гъалибвалин Йигъаз бахш дапIнайи сережемдиъ Урусатдин Президент Владимир Путин удучIвну улхбахъра хъпехъну. Хъасин, Ватандин Аьхю дявдиъ ва гьамусяаьт Урусатди Украинайин аьтрафариин гъабхурайи хусуси метлеб айи дявдин операцияйиъ чпин жанар фида гъапIу ихь эскрарин гьюрмат уьбхюри, вари саб дакьикьайиъ ккебехъну дийигъбан кьяляхъ, Дагъустандин Глава Сергей Меликов удучIвну гъулхну.
«Му йигъ ихь уьлкейин гьарсар касдиз гьаргандиз варитIан гизаф гьюрмат апIру йигъ хьибди. Гъалибвалин Йигъахъди аьлакьалу вуйи тарих гьарсаб хизандиъ а. Наслариан наслариз думу вахтарикан ктибтури, му гъагъи йигъар варидин гьаргандиз кIваинди гъузди.
1945-йи йисан Гъалибвал гъадабгъу майдин йигъан варидарин, сарун зат дявйир хьидар кIури, хиял вуйи. Гьяйифки, гъи, думу гъагъи вахтар кIваълан гьархну, Украинайин халкьдин хаинкар Зеленскийди, 9-пи май чпин гьюкуматдиъ Гъалибвалин Йигъси къаршуламиш дарапIбан бадали, Европайин йигъси къайд апIбан указдиин къул гъизигну.
Аммаки, тарихнаан мялум вуйиганси, гьадмуганра Европайин хайлин гьюкуматар совет халкьдиин алархьу Германияйин фашистарихъди сатIиди вуди гъахьну. Швнуд йисар ккудушнашра, гъира гьадрарин хилариан аьдати касар йихура, дявдин тупар тIирхура, цIийир кирчра ва магьа хъанара Украинайин аьтрафариин немец, италияйин ва инглис чIалар апIурайидар лицура, ва гъи хъанара Урусатдин эскрари, Ватандин Аьхю дявдин йисариси, гьадму фашистарихьан аьдати касар уьрхбан бадали, чпин жанар тувра. Умудлу вуза, му ражарира Гъалибвал ихьуб хьибди», – гъапну С.Меликовди.
Чан улхбаъ республикайин Главайи къайд гъапIганси, Ватандин Аьхю дявдин йисари 1 миллион агьалйир яшамиш шулайи Дагъустандиан дявдиз 180 агъзур кас гъушну. Гьадрарикан кьяляхъ гъафидарин кьадар анжагъ 90 агъзуртIан дар. Гьадмуган саб хизандиан дявдиз швнур-сар бай гъя-гъюри гъахьнуш, гъира ихь республикайин саспи хизанариан 3, 4, 5 бали Украинайин аьтрафариин гъябгъюрайи хусуси метлеб айи дявдин операцияйиъ иштирак’вал апIура. Гъийин йигъаз Дагъустандиан вуйи 1 агъзурихьна эскрариз, СВО-йиъ Ватандин улихь чпин буржи намуслувалиинди тамам апIбаз лигну, гьюкуматдин терефнаан наградйир тувна. Дагъустанлуйирикан 7 кас Урусатдин Игит ччвур тувбиинди лишанлу дапIна.
Главайин удучIвну улхуб ккудубкIбалан кьяляхъ, Каспийск шагьрин майдандилан жергйириъди эскрарин дестйир гъушнийи. Думу дестйиригъ Уьру пайдагъ айи Каспийин флотилияйин, жаради вуйи 136-пи гвардейский мотострелковый, Уманско-Берлинский, Краснознаменный, Суворовдин орденарин, Кутузовдин ва Богдан Хмельницкийдин бригадйирин, РД-йиъ айи УФСИН-дин, Дагъустандин таможняйин ва МЧС-дин, РД-йиъ айи Урусатдин ФСБ-йин аьтрафар уьрхюрайи ва дишагьлийирикан ибарат вуйи ротйир гъяйи. Эскрар майдандилан гъягъбалан кьяляхъ, Гъалибвалин 78-пи йисаз бахш дапIнайи парад дявдин техника улупбиинди аьхирихъна гъафнийи.
