1941-1945-пи йисари кIули гъубшу Ватандин Аьхю дявди ихь уьлкейин вари халкьарин кьисматариъ аьхю шил гъибтну. Думу дявдин игитарихъан тербия гъадабгъу ва дурарин адлуирс давам апIуз, багъри Ватан уьбхюз гъийин наслар кIваантIан гьязур вуйивалин вари шагьидар духьнахьа. Украинайиъ кIули гъябгъюрайи хусуси метлеб айи дявдин операцияйиъ гъи чпин хушниинди агъзуртIан артухъ дагъустанлуйир: мялимар, духтрар, депутатар ва жара гъуллугъчйир иштирак шула. Гьадрарикан сар ихь ватанагьли, Халкьдин Собраниейин депутат Расим Везирханович Гьяжиагъаевра ву.
Расим Гьяжиагъаев 1986-пи йисан Хив райондин Ургъа гъулаъ Гьяжиагъаеварин хизандиъ бабкан гъахьну. Расимдиз сар чве ва сар чи а, учв бицIинур ву. 2004-пи йисан Ургъа гъулан кьялан мектеб ккудубкIну, думу гьадму йисан Мягьячгъалайиъ Дагъпедуниверситетдин математикайин ва физикайин факультетдик урхуз кучIвру. Ва 2007-пи йисан январин вазлихъанмина дугъу чан зегьметнан рякъ Ургъа гъулан мектебдиъ математикайиан ва физикайиан дарсар кивру мялимди ккебгъру. Думу ляхин Расимди 2015-пи йисазкьан давам апIуру, ва гьадму йисан 19-пи октябиъ думу гъулан советдин кIулди ктагъуру. Чав гъулан советдиъ лихури гъахьи вахтна, Расим Гьяжиагъаевди варитIан асас фикир жямяаьтлугъ месэлйир гьял апIбаз туври гъахьну.
2021-пи йисан 19-пи сентяб-риъ Расим Гьяжиагъаев Халкьдин Собраниейин депутатди ктагъуру. Урусатдин Федерацияйин Президент Владимир Путинди 2022-пи йисан 21-пи сентябриъ бегьем дару мобилизацияйин гьякьнаан указдиин къул гъизигиган, РД- йин Халкьдин Собраниейин образованиейинна илимдин комитетдин вакил Расим Гьяжиагъаевди дишлади учв Ватандин улихь чан буржи тамам апIуз гьязур вуйиваликан мялум апIуру, ва думу жвуван хушниинди Украинайиъ кIули гъябгъюрайи дявдин операцияйиъ иштирак хьуз гъя-гъюру.
Расим Гьяжиагъаевдихъди узу Дагъ. Огни шагьриъ ерлешмиш дубхьнайи 4-пи нумрайин кьялан мектебдин гьяятдиъ Урусатдин Игит Исрафил Мягьямедовдиз ядигар диврайи серенжемдиъ таниш гъахьунза ва, мумкинвал ккабхъну имиди, дугъахъди саб бицIи икъи сюгьбатра гъубхунза.
– Расим Везирханович, СВО-йиз гъягъюз фти мажбур гъапIунву?
– 1941-пи йисан лап аьхю кьувват хъайи фашистарин Германия хабарсузди алжабгъиган, ихь уьлке уьбхюрайидариз думу аьхю имтигьян гъабхьну. Йиз аьхю аба Къазимягьямед Къазиев, дявдиз гъушур, Ватан бадали чан жан фида дапIну, кьяляхъ гъафундар, гьаци гизаф жарадарра. Хъа гъи учу, дурарин наслари, фици украинайин миллетчйирихьди ихь халкьдик кялхъюз ва рихшанд апIуз гъитру? Узу армияйиз гъушур дарза, амма йиз багъри гъулаъ мялимвал апIури, ужур хюрчабан гъахьунза. Хъа чпиина хюрч апIурайи нахшрар вари вердиш дарапIу гьяйванатар ву. Гъи ухьухъди дяви апIуз аьксиди удучIвнайидарра вари вердиш дарапIу гьяйванатар ву. Дицисдарихъди ляхин апIуз узуз ужуб тажруба айиз, гьаци вуйиган узу душваз гъушунза. Гъийин вахтнара Урусатдин Яракьлу кьувватарин вакилари чпин аьхю насларин варитIан ужударсдар аьдатар давам апIури имбувал дурарин фикриз гьаз гъюрадар? Гъи узухъди сабси дявдин женгар гъахурайи вари эскрари, фукIа гьяйиф дарди, халкьдиз ва Ватандиз гъуллугъ апIура.
– Контракт фукьан вахтназ йибтIнава?
– Йиз фикриинди, ухьу гъалиб хьайизкьан. Хъа кьушмарин улихь-кIулихь хьайидари фициб къарар адабгъуруш, гьелелиг аьгъдарзуз. Дюзди гъапиш, узу сарихъдира контракт гъийибтIундарза. Узу СВО-йиз йиз хушниинди гъушур вуза.
– Гъи фуну йишваъ ачва, наан женгар гъахурачва?
– Узу айи дявдин десте гьамусяаьт ихь кьушмарин кIакIнаъ айич. Учу Запорожский областдиъ кIули гъягъюрайи гъизгъин женгариъ иштирак шулача. ВаритIан читин, лазим вуйи табшуругъар тамам апIурача. Му дяви ву, ва дявдиъ ужу ву гъапиш, гьич сарра хъугъидар. Душваъ шулайи гьядисйирикан ктибтуз ва гьацира дявдин сир ачмиш апIуз ихтияр адар. Гьелелиг узу айи дестейиъ йивну гъакIир адар, бицIиди зийнар гъахьи эскрар а. Гъи душваъ иштирак шулайи эскрарин кьастра, вари читинвалар аьгь дапIну, душман чан мукьаз хъуржуб ва дагъитмиш апIуб вуйич.
Йиз фикриан, ухьуз къаршуди удучIвнайи гьюкуматар учу думу дявдиъ фунуб жюрейиинди вушра гъалибвал гъадабгърувалин гьелелиг гъавриъ ахъри адар.
Расим Гьяжиагъаев, дугъриданра, дирбаш дагълу жигьиларикан, гъийин деврин нумуналу касарикан сар ву, пуз шулу. Гъи дугъаз багъри гъулаъ чан адаш Везирхан, дада Дюн’яхатун, чан уьмрин юлдаш ва кьюр бай ккилигура.
Гъит ихь Ватан ва хизан бадали зегьмет зигурайи Расим Гьяжиагъаевсдар баяр артухъ ишри.
