Майин 28-пи йигъан Мягьячгъалайиъ «Маидат» ресторандиъ Табасаран райондин имам Ансар-гьяжи Рамазановди тешкил дапIнайи табасаран миллетдин вакиларин ифтар – ушв гьибтувал кIули гъубшнийи.
Къайд апIувал лазим вуки, уьлкейин жара йишвариъси, му гирами Рамазандин вазлиъ сатIиди ушв гьибтувалин мажлисар Дагъустандиъра гъахура. Табасаран районра кьяляхъ гъубзнадар.
Ушв гьибтувал гирами Кьур’андиан вуйи аятар, нашидар урхбалан ккебгънийи. Хъа мажлис РАН-дин ДНЦ-йин ИЯЛИ-йин илимдин гъуллугъчи Шарафудин Дашдемировди ачмиш гъапIнийи. Дугъу гьаму йисан му жюрейин мажлис табасаранарин арайиъ сабпи ражари гъабхурайиваликан гъапнийи. «Ислам – сабвалихьна, мясляаьтнахьна дих апIурайи дин ву. Ислам диндин къанунарихъди гъушу кас асуллагь швумал хьидар. Хъа ухьуз варитIан аьхю нумуна Мягьямад Пайгъамбар (с.аь.в.) ву. Гъюблан-гъюбаз ислам динди Дагъустандиъ вари цирклариъ чан ччивар яркьу апIура. 1990-пи йисари ихь уьлкейиъ гизаф читинвалар гъахьнийи. Мектебариъ тербияйин ляхин кьяляхъ гъивнийи. Гъи аьгьвалат дигиш дубхьна. Дин хъапIрудариз саб жюрейинра манигъ’вал адар. Эгер увуз яв хал уьбхюз, дин хъапIуз манигъ’вал адарш, Аллагьу Тяаьлайи чан каламариъ уву яшамиш шулайи уьлкейин къанунар уьрхюз буржлу апIура. Гьюкуматди динагьлийириз ужудар шартIар тямин дапIна. Жямяаьтлугъ сагъ апIуз, гъюзимбу наслариз ужуб тербия бадали гъахурайи ляхнариз ухьу шюкюр дапIну ккунду. Районариз, гъулариз гьаънайи диндин вакилар жямяаьтлугъдихьан жаради гъитну ккундар, ухьу дурариз кюмек дапIну ккунду», – къайд гъапIну Ш.Дашдемировди.
Хъасин дугъу гаф гьаму ушв гьибтувалин мажлис тешкил гъапIу Табасаран райондин имам, табасаран чIалниинди чапдиан удубчIвурайи «Асса-лам» газатдин редактор Ансар-гьяжи Рамазановдиз тувнийи.
«Гьюрматлу ватанагьлийир! Учву фикир тувнуш, вари халкьарин, гьюкуматдин гъуллугъчйири ва диндин вакилари Рамазандин вазлиъ саб суфрайихъ дусну, сатIиди ушв гьибтру. Гъубшу йисанра гьамциб ужуб ляхниз ният гъапIнийхьа, амма думу кIулиз адабгъуз гъабхьундайи. Цци гьаму мажлисдиз ихь депутатариз, райондин администрацияйин вакилариз, агьли касарин Советдин председателиз, журналистариз, аьлимариз теклиф гъапIунча, хъа, гьяйифки, саспидарихьан мажлисдиз гъюз гъабхьундар. Дяргъидарикан гиранра дарихь, гъафидариз – аьхю вуйи чухсагъул. Гъийин мажлисдин мурад-метлеб – диндин кIулиъ айидар ва гьюкуматдин гъуллугъчйир сатIиди ихь серенжемариъ иштирак хьуз гъитувал вуйихь.
Улихьнаси узу табасаран чIалниинди вуйи газатдин редакцияйи кIули гъубху аьхю диктантдиъ иштирак гъахьиган, гизафдар мюгьтал гъахьнийи. Бязидарин фикриинди, диндин улихь хьайидари чпи жараси духну ккунду. Ваъ, ихь халкь, ихь ватан бадали гъабхурайи гьарсаб ужуб ляхниъ иштирак хьуз рази вуза.
Гъи мушваъ уч духьнайидар асас вуди Табасаран райондиан удучIвнайидар вухьа. Пуз ккундузузки, Москвайиз, Мягьячгъалайиз ва гьацира жара йишвариз удучIвну гъушну кIури, ухьу ихь багъри юрдар, багъри халкь кIваълан гьаъну ккундар. Улихьнаси Москвайиъ айи ихь ватанагьлийирихъдира гюрюшмиш гъахьунза. Гьадушвариъ айидаризра читинвалар а. Ихь бицIи Ватандиан удучIвну гъушган, ухьу сари сар кIваълан гьаъну ккундар, сар-сариз кюмек апIури, кюмекнан хил гьачIабккури ккунду. Чиб чпихъди танишди хьувал, албагну мажлисар гъахувал ихь хилиъ а, ухькан лазим вуйиб – ихь арайиъ мясляаьт, аьшкь ади хьувал ву», – гъапну чан удучIвну улхбаъ Ансар-гьяжи Рамазановди.
Ансар Рамазановдин улхуб ккудубкIбахъди сабси, лавландин гъудгниз дих апIру азандин сесра гъабхьнийи. Мажлисдиз уч духьнайидар гъудган апIуз гъушнийи. Гъудган ккудубкIбан кьяляхъ вари ушв гьибтуз жюрбежюр хурагарихьди дабалгнайи столарихъ дуснийи.
Ушв гьибтбан кьяляхъ мажлис давам гъабхьнийи. Уч духьнайидарин улихь табасаран халкьдин агьли касарин Советдин председатель Исамудин Рамазанов, «Табасарандин нурар» газатдин кIулин редактор Гюлягьмад Маллялиев, ДГУ-йин профессор Низами Аскеров, табасаран чIалниинди удубчIвурайи «Дагъустандин дишагьли» журналин редактор Сувайнат Кюребегова, «Ппази» журналин кIулиъ айи Феруза Ражабова ва «Табасаран райондин жигьилар» ДРОО-йин председатель Муса Гьябибов гъулхнийи.
Дурари ушв гьибтувалин мажлис тешкил гъапIдариз чухсагъул мялум гъапIнийи ва му жюрейин серенжемари ихь табасаран халкьдин читин месэлйир сатIиди гьял апIуз кюмек тувруваликан гъапнийи.
