ЦIийи прокурор дерккну
Урусатдин Президентдин указдиинди, 5 йисаз вуди Дагъустан Республикайин прокурорди Виктор Эпп тасдикь гъапIну.
Виктор Эпп 1963-пи йисан Рязанский областдин Скопине шагьриъ бабкан гъахьир ву. Багъри региондин прокуратурайиъ дугъу 30 йистIан артухъ вахтна ляхин гъапIну. Аьхиримжи кьюд йисан думу Ямало-Ненецкий автономный округдин прокурорди гъилихну.
ЖикIруган, ихтият апIинай!
Ккудубшу гьяфтайин арайиъ рес-публикайиъ 7 кас штукк ккахьну гъийихну.
Дагъустан Республикайин силис гъабхру управлениейин пресс-гъуллугънаан тувнайи мялуматаринди, цци гьавайин шартIар манидар вуйивализ ва республикайиз гъюрайи туристарин кьадар гизаф шулайивализ лигну, нирарихъ, даграрихъ ва гьюлихъ рягьятвал гъадабгъурайидарин арайиъ, штук жикIбан къайдйир дюрюрхювал себеб вуди, уьмрихъ мягьрум шулайидарин кьадар артухъ дубхьна.
Гьацдар бедбахтвалин дюшюшар гъубшу гьяфтайиъ Мягьячгъала шагьриъ, Къизилюрт, Мягьярамкент ва Дербент районариъ гъахьну. Натижайиъ 2 бегьем яш дархьи бицIидар ва 3 аьхю касар гъийихну.
Гьаму вари дюшюшарин гьякьнаан ахтармиш апIбан ляхнар гъахура.
Балугъарин ярмарка хьибди
14-пи июлиан 16-пи июлизкьан Мягьячгъала шагьриъ Аварарин теат-рин аьтрафариин балугъарин ярмарка хьибди. Му ярмаркайин тешкилатчи Дагъустан Республикайин балугъарин мяишатдин комитет ву.
Къайд апIуб лазим вуки, республикайин агьалйириз балугъарин сурсат исккан кьиматнаан масу гъадабгъуз мумкинвал хьпан бадали, республикайин балугъарин мяишатдин комитетди кми-кмиди гьамцдар ярмаркйир кIули гъахура.
Гьаму ражарира ярмаркайиъ асас вуди масу туврайи сурсатар балугъариндар хьиди; душваъ гьацира малинра, чарвайинра йикк масу гъадабгъуз хьибди.
«Рубасдин мукьмар»
15-пи июлиъ Табасаран райондиъ «Рубасдин мукьмар» кIуру халкьдин яратмишарин республикайин фестиваль кIули гъябгъиди.
Гьар йисан кIули гъабхурайи фестиваль цци РД-йин искусствйирин лайикьлу гъуллугъчи Кьасум Мягьямедовдин 80 йисандин юбилейиз бахш дапIна. Гьаддиз фестиваль бажаругълу композитор бабкан гъахьи йигъан Хючнаъ айи Ургур чвуччвунна сар чуччун гъалайин аьтрафариин кIули гъябгъиди.
Мидланра гъайри, фестивалин дахилнаъди Хючнаъ айи искусствйирин мектебдин цалик композитор кIваин уьрхбан тахта кебхди, ва гьацира райондин библиотекайин улихь Шамил Къазиевдиз ядигар (бюст) дивди.
Футболин талитариъ иштирак йихьай
22-пи ва 23-пи июлиъ Хив райондин ГъуштIил гъулан стадиондиин футболиан райондин дережайин талитар кIули гъягъиди. Талитар Дагъустан Республикайин Конституцияйин йи-гъахъди аьлакьалу вуди «СТРОЙ-ЛИФТ» ООО-йи тешкил апIурайидар ву.
Талитариъ иштирак хьуз анжагъ гъулариъ яшамиш шулайи касаризтIан ихтияр адар. Гьарсаб команда 11 касдикан ва 1 тренерикан ибарат дубхьну ккунду.
Кьюд йигъандин арайиъ кIули гъябгъру талитарин натижйириз лигну, гъалиб гъахьи командйир пулиинди ва жара пешкешариинди лишанлу апIиди.
Рякъяр рас апIура
Гьаму йигъари Табасаран райондин Хючна гъулан Жяфаровдин кючейизди гъягъру бицIи рякъяриъ (шиклиъ) ва Хянягъ гъул’антина гъябгъюрайи асас рякъюъ расвалин ляхнар кIули гъухну.
Жяфаровдин кючейи Хючна – Хьарагъ машинарин рякъюн саб пай бисура. Думу райондин швнуб-саб гъулан поселенйириз гъябгъру рякъ ву. ИкибаштIан, дидик хайлин бицIи рякъяр ктикьура. Асас вуйи ляхнарин кьяляхъ, 2000 кв метр рякъ’ин асфальт улубзну.
Хянягъ рякъкан улхуруш, думу Хючна – Хьарагъ рякъ’ан Рубас нирин гъядлантина Хянягъ гъулан кьялазкьан гъябгъюра.
Рякъяр рас апIурайи тешкилатдин вакили къайд гъапIганси, дагълу жилин ижмивализ лигну, лазим вуйи кьадартIан артухъ ляхнар гъахуз мажбур гъахьну.
Расвалин ляхнар республикайин «Йиз Дагъустан – йиз рякъяр» прог-раммайин дахилнаъди кIули гъахурайидар ву. Му программайин дакьатарихъ цци Табасаран райондиъ 11 кючесан рас апIиди. Рякъяр рас апIуз мумкинвал транспортдилан вуйи налогарилан жара апIурайи аьлава дакьатарира тувра.
Лихруриз ляхин бихъуру
РД-йин зегьметнан ва яшайишдин артмиш’валин министерствойи вари Урусатдин «Урусатдин ляхин. Мумкинваларин вахт» зегьметнан ярмаркайин дахилнаъди республикайиъ кIули гъуху серенжемарин натижйир гъивну.
Министерствойин пресс-гъуллугъ-наан туву мялуматариинди, ярмаркайиз 3,4 агъзур инсан гъафну, дурарикан 1563 студентар ва мектебарин заан классариъ урхурайи жигьилар вуйи. Иштиракчйириз Дагъустандиъ айи 1,4 агъзур лихру йишварикан ва жара регионариъ айи 6 агъзурихьна азадди вуйи гъуллугъарикан мялуматар тувнийи.
Вари Урусатдин региондин ва федеральный этапарин зегьметнан ярмаркайи 237 кас лихру йишварихъди тямин гъапIну. Мидланра гъайри, региондин жюрбежюр чIатху карханйирин вакиларихъди сюгьбатар гъахбан кьяляхъ, 143 кас чпи ляхниз кьабул апIайиз ккилигура.
