Веледарин абйир-бабарихьна вуйи гьюрмат – му чпиз уьмур багъиш апIбаз ва ккунивализ, юкIв убгбаз ва гъайгъу зигбаз вуйи кьимат адру аьхю гьюрмат ву.
Абйир-бабарихьна гьюрмат адру бицIир ччивар ккадру зяиф гьариз вая штун ккул адру бицIи нириз ухшар ву, кIури шулу.
Гьяйифки, аьхиримжи вахтна бабкан гъахьи сабпи йигъланмина ихь гъвалахъ хъайи варитIан багахьлу инсанарихьна вуйи мани рафтар ва гьюрматлу янашмиш’вал саспи хизанариъ зяифди вуйивалин шагьидар шулахьа. Гъийин девриъ насларианмина абйир-бабаринна веледарин арайиъ айи гьюжатнан аьлакьйирин цIийи кIалбар арайиз гъюра, багъри веледар абйир-бабарихьан ярхла хьпан, сар-сарихъди гаф-чIал дарапIбан дюшюшарра а.
Бязи абйир-бабариканра гъийин гьялаки нириз ухшар вуйи уьмриъ чпин веледарин тербияйиз артухъ фикир тувуз вахт гьубкIри адруваликан, гьаддихъди сабси, веледарин терефнаан чпиз бегьем гьюрмат дярябкърайиваликан ебхьуру. Веледарин чпихьна вуйи янашмиш’валиин рази дарудари дурар хъюлакк дисбан вахтар шулу. ИкибаштIан, мициб аьгьвалатну инсанариз гужалди тясир апIуру, чIуру натижйирихъна хуру.
Арабир абйир-бабар ихь варитIан багьалу, чпиз барабар касар сану адру инсанар вуйиваликан, ихь даягъ цалар ва ижми макан, ихь вари уьмур, гележег ва кIван хиялар цIалцIамди уьрхюрайи кьувват вуйиваликан гьархри шулхьа. Абйир-бабари ихь тамам дархьи ляхнар ухьухъди сатIиди, дерд – ухьутIан гужалди гьисс апIуру, хъа ихь хъаркьувалариин, шадвалариин ухьутIан яманди рази шулу.
Инсандин уьмриъ абйир-бабари уйнамиш апIурайи зурба роликан хайлиндар чпи абйир-бабар гъахьигантIан гъавриъ шулдар. Аба вая баб хьувалиъ фукьан аьхю мяна аш, веледар тербияламиш апIуз фукьан кьувват ва ккунивалин гьиссар лазим вуш, бицIирин гьюрмат гъазанмиш апIбан бадали, фукьан сабур ва аькьюл лазим вуш, гьадмуган гъавриъ шулу.
Абана баб – варитIан багьалу девлет ву. Дурар имиди гьюрмат апIуз, гъайгъу зигуз, учвхьан шлу пешкешар багъиш апIуз чалишмиш йихьай. Хъугъай, аба вая баб имдру гьарсар касдин хиялар саб жюрейиндар ву: «Эгер вахт кьяляхъ апIуз гъабхьнийиш». Дурарин варидарин кIваъ чпин абайиз ва бабаз хъана артухъ гьюрмат ва хатур апIуб а. Хъа гьяйиф, вахт кьяляхъ апIуз шлуб дар.
