Улихьна йигъари Табасаран райондин администрацияйиъ РД-йин экологияйинна табиаьтдин девлетарин министр Набиюллагь Къарачаевдин иштирак’валиинди яркьу совещание кIули гъубшну. Думу райондиъ айи зирзибил ва тикилишчивалин кьяляхъ гъузрайи хъархъсар (ТБО) гатIахьбан гьякьнаан цIийи къайда тешкил апIувализ бахш дапIнайиб вуйи.
Серенжем ачмиш апIури, райондин глава Мягьямед Къурбановди уч духьнайидариз гьаму йисан 1-пи январихъан мина райондиъ ТБО гатIабхьбан цIийи къайда ляхник кипнайивал кIваин гъапIну. Гьаддихъан мина хъархъсар райондиан гъахури, дурар гьясил апIбан ляхнар кIули гъахурайиб «Экологи-ка» ООО региондин операторар ву.
«Зирзибил ва хъархъсарин гьякьнаан райондиъ сар касдин кIулихъ 37 манат гъадабгъура. Му зирзибилихъди аьлакьалу месэлайин гьякьнаан учу ич администрацияйиъ региондин операторарихъди швнуб-сабан гюрюшар духнашра, гьелелиг райондиан зирзибил, ТБО-йин хъархъсар гъахбан ляхин лазим вуйи къайдайиинди тамам апIурадар», – гъапну райондин главайи.
Чан нубатнаъ министри къайд гъапIганси, Табасаран райондиъси, зирзибил, ТБО гъабхбан месэла гьамусяаьт вари йишвариъ а, ва думу гьял апIбан бадали, вари кьувватар жалб дапIну ккунду
«Месэла гьял апIбан бадали, сабпи нубатнаъди, хъархъсар гъахурайи региондин операторихъди йикьрар гъапIганси, гъапIу ляхнин пул тувбан месэла ухди гьял апIувал чарасуз лазим ву. Фицики, ляхин тамам апIбан бадали, дакьатар лазим шула», – гъапну Набиюллагь Къарачаевди.
Чан улхуб ккудубкIбан кьяляхъ, дугъу региондин операторин вакиларикан райондин гъуларихъди вахтниинди хъархъсар гъахбан ва зирзибилихъан пул тувбан гьякьнаан ляхин дюз алапIувал ккун гъапIну.
Серенжемдиъ иштирак гъахьи «Экологи-ка» ООО-йин вакил Альберт Черниковди мялум гъапIганси, райондиан хъархъсар гъахувал давам шула, амма гъапIу ляхнихъан пул тувувал лап зяифди ву.
«Учу физический касариз почтайиъди зирзибилихъан тувну ккуни пулин гьякьнаан квитанцйир хътаунча. Хъа гьелелиг дурарин терефнаан сес-дих адар, яна инсанариз пул тувуз ккунди адар», – гъапну региондин операторин вакили.
Альберт Черниковдин гафариз жаваб вуди, Мягьямед Къурбановди гьамци гъапнийи: «Ич терефнаан зирзибил гъабхбахъан гьякъи тувуз учу гьязур вуча ва му месэла багарихьди гьял апIидича. Хъа ичв нубатнааъ учвура лазим вуйи къайдайиинди зирзибил гъабхуз чалишмиш йихьай».
