Магьа Гирами Рамазандин ваз аьхирихъна гъафну. Мусурмнарин варитIан ккуни машквар Ураза-байрам улубкьну.

Му важиблу машкврин йигъан мусурмнар багахьлуйирихьна, сагъламвалин терефнаан читинвал кайидарихьна машквар тебрик апIуз гъягъюру, дурари бицIидар рази апIуз мумкинвалар агуру. Ислам динди ухьуз сатIи хьуз, чвевал, дуствал ва гьюрмат уьбхюз улупуру. Эгер мусурман дин хъапIрайидари му къайдйир уьрхюруш, Аллагьу Тяаьлайи ухьуз берекет бахш апIиди.

Вари вазлин арайиъ мусурмнари ушвар дисури, сабабнан ляхнар апIури, багахьлуйириз-дустариз ушв гьибтуз гъач кIури, садакьа туври гъахьну. Гьаму йисан ич газатдин коллективдира рягьимлувалин ляхник чан пай кивну. Вари гьаму ляхнари мусурмнарин сатIивал, сабвал субут апIура. Гъит, Аллагьу Тяаьлайи ихь ниятариз лигну сабаб бикIри.

Гьюрматлу чвйир ва чйир!

Учу ичв Ураза-байрам машквар кIваантIан тебрик апIурача. Гъит, гьаму аку машкври инсанарин юкIвар марцц апIуз кюмек туври, дуствал ва арайиъ айи аьлакьйир мюгькам апIри. Аллагьу Тяаьлайи ихь варидин гъидису ушвар, гъапIу гъудгнар, туву садакьйир, ужудар ляхнар, гъапIу дюъйир кьабул апIри. Учвуз жандин мюгькам сагъ’вал, хизандин хушбахтвал ккун апIурача.

«Табасарандин нурар» газатдин коллектив