Хьадан фаслин вахтна грипп ва ОРВИ уьзрар ухьхьан ярхла шула. Дурар мичIлишин айи вахтнан уьзрар ву, гъапишра шулу. Думу уьзрар ктарди, ихь яшайишдиъ инфекцияйин жара уьзрарин кьадарра аьхюб ву. Мицдар уьзрариз аьксиди гъабхурайи профилактикайин ляхнихъди таниш хьпан бадали, узу Дербент шагьрин бицIидарин поликлиникайин инфекцияйин уьзрарин профилактика гъабхру кабинетдин заведиш Наида Загьировайихъди гюрюшмиш гъахьунза.
Наида Дарвиновнайи гъапиганси, гьамусдиз инфекцияйин 14 уьзрариз аькси прививкйир дапIна. Инфекцияйин жюрбежюр уьзрариз аьксиди профилактикайин ляхин гъабхури, му кабинетдин пишекрари абйир-бабариз мани вахтна паркариъ, яркврариъ кьацIар апIру хицIарихьан ихтиятди духьну ккуниваликан ктибтура.
«ХицIру кьацI гъапIган кубчIвуз мумкин вуйи хицIарин энцефалит уьзур ахтармиш апIбан ва кьацI гъапIу хицI адабгъбан бадали, сагъламвал уьбхбан тешкилатдиз дуфну ккунду. КьацI гъапIдариин 2 гьяфтайин арайиъ гюзчивал гъабхурча. Учу думу хицI адабгъну, шюшдин гъабраъ ивну, ахтармиш апIбан бадали, Мягьячгъалайиз хътапIури шулча. Рудрарин инфекция-йин уьзрар холера, зегьерламиш хьувал ву. Му уьзрарин лишнар кайидар учу инфекцияйин отделениейиъ гъит-рача ва дурариин гюзчивал гъабхурача. Хьадан вахтна гьаммишан профилактикайин ляхин гъабхури, абйир-бабариз, бицIидарин багъариъ тербиячйириз баяр-шубариз дурубхьу шид тувуб къадагъа апIурача», – давам гъапIну Наида Загьировайи.
Дугъу къайд гъапIганси, гизаф инсанарин хусуси хулариъ айи шид хлор ктруб ву, гьаддиз, жвуван хизан инфекцияйин уьзрарихьан уьбхбан бадали, гъубхьу шид ишлетмиш дапIну ккунду.
«Интернетдиъ «чIиви» шид убхъури ккунду кIури, гизаф макьалйир дидикIна. Думу дюз дару мялумат ву. Гьацира прививкйириз аькси вуди дикIурайи макьалйирира инсанар авара апIура. Баяр-шубариз абйир-бабарин ихтияр адарди прививкйир апIуз шулдар. Бязи абйир-бабар гъаврикк ккаъбан бадали, гизаф ляхин гъабхурача. Эгер диндихъди аьлакьа ади прививкйир апIурадарш, учу республикайин Муфтиятдин вакиларихьнара илтIикIурача. Жара себебарихъди аьлакьалу вахтна, инсанар гъавриъ тIауз чалишмиш шулча. Вушра, гъавриъ адрахърударра шулу», – давам гъапIну духтри.
Дугъу гъапиганси, гьаммишан масу гъадагъру итIру сурсатарин ерийиз фикир тувну ккунду. Базрариъ, рякъярихъ ариш-вериш апIурайидариз чпин хилиъ пул абхъхъан тина, муштарйирикан фикир ктар. Масу туврайиб наънан-вушра аьгъдру дилаварчйир гизаф а.
«Ихь республикайиъ кIамкIар уьзур тарабгъуз хъюгъиган, дидин прививка дарапIу баяр-шубариз бицIидарин багъариз ва жара тешкилатариз гъягъюз къадагъа гъапIнийча. Эпидпаратит уьзурра тарабгъру, гъагъи уьзрарикан ву. Думу уьзриз «свинка» кIури шулу. Думу уьзур кайирин саб жвурнан ибахьинди вуйи тереф дябгъню шулу. Гьацира, ангина уьзур дархьбан бадали, хьадан вахтна лап мичIли шид, яманди гъабгъу мороженое ишлетмиш дапIну ккундар. Хьадан вахтна гьюлихъна гъушдарикра инфекцияйин уьзрар кучIвру. Ухьуз аьгъюганси, гьелелиг Дербент шагьриъ канализацияйин марццишин апIру дараматар адар. Вари чиркишнар гьюлизди гъягъюра. Сач гизафдар гьюлиъ айи инфекцияйиан ктIерццнийи. Гизафси думу инфекция июль вазлиъ артухъ шулу», – кIура Н.Д.Загьировайи.
Гьацира, духтрин гафариинди, марццишназ фикир тутрувру хизанариан вуйи баяр-шубариин шарар алди шула. Милли календариъ улупнайи прививкйир образованиейин вари тешкилатариъ айи баяр-шубариз апIура. Гьацира жара гьюкуматариз душну гъафидарин хизанарра гюзчиваликк гъитра.
Гьаммишан жвуван хизандин, гизафси бицIи яшнаъ айи баяр-шубарин сагъламвализ фикир туври, вахт-ниинди лазим вуйи прививкйир дапIну, бедендин, яшамиш шулайи хуларин, гьяятдин марццишназ фикир туври ккунду. Кючейиан хулаз гъафи вахтна, гьарсар аьхюр-бицIирикан сябнигьди хилар жикIувал тIалаб апIури, итIру йимишар ужуди жикIури, мичIли шид дурубхъури гъахьиш, хатIалу уьзрарихьан ярхлади гъузуз шулу.
