Цци 12-пи июндиъ ихь уьлкейиъ, гьадму гьисабнаан ихь респубикайиъра, гьюкуматдин аьхю эгьемиятнан машквар – Урусатдин Йигъ къайд гъапIну. Мялум вуйиси, думу йигъ 2002-пи йисазкьан Урусатдин гьюкуматдин асиллу дарувалин гьякьнаан декларация кьабул гъапIу йигъси мялум вуйи. Думу Урусатдин гъийин девриъ арайиз дуфнайи гьюкуматдин цIийи машкврарикан саб ву.
Урусатдин Йигъ, гьелбетда, Табасаран райондиъра къайд гъапIну. Думу йигъаз бахш вуди, жигьиларин тешкилатарин вакилари жюрбежюр жямяаьтлугъ йишварихь улихь ккимиди тялукь плакатар керхнийи. Хъа 12-пи июндиъ райондин культурайин Хулан гьяятдиъ культурайин Хулаъ лихурайидарин коллективди гьязур дапIнайи яркьу программайин концерт улупну. Концерт ккебгъайиз, дина уч духьнайидарин улихь райондин администрацияйин культурайин, спортдин, туризмдин ва жигьиларин политикайин отделин начальник Аьбдулвагьаб Аьбдулов удучIвну гъулхнийи. Дугъу машкврин тарихдикан, гъийин дюн’яйиъ Урусатдин роликан ктибтну, уч духьнайидар маш-кврихъди тебрик гъапIну.
ДумутIанра савайи, райондин «Гъуларин поселенйирин арайиъ сатIи дапIнайи библиотекйирин гъурулуш» МКУК-диъ лихурайидари культурайин Хулан гьяятдиъ Урусатдин Йигъахъди аьлакьалу китабарин выставка тешкил гъапIнийи.
