Июндин 22-пи йигъ – Ватандин Аьхю дяви ккебгъу йигъ ву. 1418 йигъанна йишван пис душмнихъди давам гъабхьи дявдиъ думуган ихь аьхю Ватан вуйи Советарин Союздиан 27 миллионтIан артухъ инсанар уьмрихъ мягьрум гъахьну. Дявди миллионариинди инсанарин кьисматар гъюргъну.
Накь мектеб ккудубкIну, фикрариъ урхбан тешкилатар ктагъурайи жигьилар гъагъи женгариъ иштирак хьуз хъюгъну. Му ярхи 4 йисандин арайиъ агъзрариинди инсанар, женгариъси, жюрбежюр уьзрарианра, гаш`валианра гъийихну. Вушра, агьалйирин ватанпервервали, кIубанвали, багъри Ватан душмнихьан азад апIбаъ фукIа гьяйиф дарапIрайивали ихь халкьариз фашистарин Германияйиин гъалиб хьуз ва Европайин гьюкуматарра азад апIбак лайикьлу пай кивуз мумкинвал тувну.
Душмнариз машна машди дийигъну, дурар танкь апIбаъ гьунарар улупну гъийихдар, чIивиди гъузну, дявдиан кьяляхъ хътакдар кIваинди гъитбан бадали, июндин 22-пи йигъ «КIваин уьрхбан ва гъамлувалин Йигъси» къайд апIура. Му йигъан, Урусатдиъси, жара гьюкуматариъра жюрбежюр серенжемар кIули гъягъюру. Му макьала бикIуз гьязур шули, Дербент шагьрин дявдин ва зегьметнан ветеранар фици яшамиш шулаш, дурариз гьюкуматдин терефнаан фициб фикир тувраш ахтармиш апIуз ккунди, узу Дербент шагьрин ватандашариз социалин кюмек тувру Управлениейин начальник Людмила Терещенкойихъди гюрюшмиш гъахьунза.
Дугъан гафариинди, гьамусдиз Дербент шагьриъ Ватандин Аьхю дявдин женгариъ иштирак гъахьидарикан Анна Аьзизова, МягьямедтIагьир Даштемиров ва Мария Присижненко чIивиди ими. Дурарикан шагьриъ яшамиш шулайир анжагъ Мария ПрисижненкотIан дар.
«Анна Аьзизова Ставрополь шагьриъ чан шуран хизандихъди яшамиш шула, хъа МягьямедтIагьир Даштемиров – чан худул балин хизандихъди. Дурар шубридра шагьрин агьалйир ву, кьаби гъахьиган ялгъузди гъудрузуз, багахьлуйирихь яшамиш шула. Мария Присижненкойин риш кечмиш гъахьну, гьамусяаьт думу чан худул шуран хизандиъ яшамиш шула. Дявдин иштиракчйириз гьюкуматди 40 000-рихьна пенсия тувра. Гьацира дурар дявдин инвалидарра ву, гьаддиз дурариз гьар вазлиъ ЕДВ-йин пулин дакьатарра тувра»,
– мялум гъапIну Людмила Васильевнайи.
Дявдин вахтна: «Вари фронтдиз, вари гъалибвализ!» – кIуру лозунгди бицIир, жигьил, кьабир дарпиди, гьарсар касдин рюгь за апIури, заводариъ, хутIлариъ зегьмет зигуз мажбур апIури гъахьну. Дявдиз гъушу жиларин ерина дишагьлийир, баяр-шубар лихури гъахьивал, дурари гъалибвал бадали гвачIниан хябяхъдиз зегьмет зигури гъахьивалра гьунарси гьисаб дарапIди гъибтуз шулдар.
Мицдар зегьметкешариз «Далуйин зегьметкеш», «Зегьметнан ветеран» ччвур тувна ва гьюкуматдин терефнаан му касаризра льготйир а. Людмила Васильевнайи къайд гъапIганси, гьамусяат Дербент шагьриъ 173 далуйин зегьметкешар ва 5794 зегьметнан ветеранар а.
Дявдин женгарин ветеранарси, дурарра Гъалибвалин Йигъаз вуйи машкврин улихь РД-йин Главайин терефнаан тебрик ва пулин дакьатарихъди пешкешлу апIура. Гьацира далуйин зегьметкешариз 760 манат, политикайин зулмикк гъахьидаризра гьадму кьадар пул тувра. Реабилитировать гъапIдариз туврайиб 1013 манат ву. Зегьметнан ветеранариз 504 манат тувра. Гьацира дурариз варидариз коммунальный льготйирра а.
Му гъамлу йигъахъди аьлакьалу вуди ццийин йисан 24-пи ражари гъябгъру серенжемдиъ гьюкуматдин кIули айидар, дявдин, зегьметнан ветеранар, дявдиъ гъийихдарин багахьлуйир, жямяаьтлугъ тешкилатар, му пис дявдин гьядисйирихьна вижнасузди гъузуз даршлудар ва ихь кIул`ин ислягь завар гъузну ккунидар иштирак хьиди.
Ухьу фукIа я фужкIа гьархидархьа ва Дюн`яйин фуну пIипIнаъ вушра, дявйириз аькси хьидихьа. Гъит, гьарсарин кIул`ин аку ригъ гъубзри!
