Ихь уьлкейин вари халкьарин уьмриъ Ватандин Аьхю дяви кIуру ужуб дару гьядиса гъабхьну. Му дявдиз, вари ватандианси, Табасаран райондианра гизаф жигьил баяр гъушну. Гьадрарикан сар Гьясан Ражабовра вуйи.

Гьясан Ражабович Ражабов 1923-пи йисан 3-пи майдиъ Табасаран райондин Халагъ гъулаъ касиб нежбрин хизандиъ бабкан гъахьну. Дугъан байвахт лап читинуб вуйи. БицIидихъан мина думу аьхюдарихъди сабси колхозариъ лихури шуйи. Мектеб ккудубкIбан кьяляхъ, 1939-пи йисан Гьясан Ражабов Дербентдиъ педагогвалин училищейик урхуз кучIвну. 1942-пи йисан думу Халагъ гъулан советдин секретарди ктагънийи. Гьадму йисан жигьил пишекар гьацира Бакуйин военный училищейик урхуз кучIвру. Училищейин кьяляхъ Гьясан Ражабов ва дугъан дустар 9-пи армияйин 11-пи гвардияйин корпусдин дахилнаъди дявдиз гьаъну.

Осетия азад апIурайи дявйириъ Гьясан Ражабовичдин арчулну ликрик гюллйир куркIнийи. Гъагъи зийнар сагъ апIуз сифте думу Мягьячгъала шагьриз, хъасин цIиб вахтналан Тбилисийиъ ерлешмиш дубхьнайи дявдин госпитализ гъурхнийи. 1943-пи йисан дявдиан чан багъри гъулаз кьяляхъ хъадакну гъафну.

Гьясан Ражабов аьхю хизандин эйси ву: дугъаз 8 велед – 4 риш ва 4 бай, 30-рихьна худлар, 21 гудул а.

Гьясан Ражабов гьамусяаьт гъулаъ чан бицIину бай Рамазнахъди ва дугъан хизанарихъди яшамиш шула. Дугъан 96 йис ву. Гъит, Гьясан абайиз Аллагьди сагъ’вал туври.

Учу, гъулаз гъафиган, кми-кмиди Гьясан абайиина улукьуз гъягъюри шулча. Дугъу дявдин женгарикан, чахъди гъахьи советарин игит эскрарин дирбаш’валикан, дявдин кьяляхъ улуркьу гъагъи йисарикан ктибтури, Ватан ккун апIбан, Ватандиз, багъри гъулаз вафалуди гъузбан, ватанпервервалин насигьятар туври шулчуз.

Гьясан аба, учу яв насигьятар, яв теклифар кьабул апIури, дурар ва яв гьунарар саб вахтнара кIваълан гьадрархуз гаф туврача.