Хьадан кьялан вазлин сабпи йигъан Дербент шагьрин Нарын — гъалайиин июнь вазлин 28-пи йигълан ккебгъну июль вазлин 5-пи йигъазкьан  ихь республикайиъ давам шлу, «Дагълуйир» кIуру Варихалкьарин фольклоринна аьдати культурайин IX фестиваль кIули гъубшну. Му шадвалин мяракайиъ, ихь республикайин фольклорин ва аьдати культурайин коллективарси, харижи гьюкуматариан дуфнайи 70-тIан артухъ коллективарра иштирак гъахьну.

Серенжем Урусатдин Федерацияйин культурайин Министерствойин, Урусатдин гьюкуматдин В.Поленовдин ччвурнахъ хъайи халкьдин яратмиш апIбан Хулан, Дагъустан Республикайин культурайин министерствойин ва республикайин Глава Владимир Васильевдин тешкиллувалиинди кIули гъубшну.

Гъийин сикинсуз вахтна мицдар серенжемари, жюрбежюр миллетарин культурйирихъди таниш хьуз мумкинвал туври, дюн` яйин жюрбежюр пIипIариан вуйи халкьар сатIи апIура ва гьюкуматарин арайиъ айи аьлакьйир ужуб терефназди дигиш хьуз гъитра. Му йигъан шадвалин мярака Кьибла Дагъустандин циркнан артистарин заан устадвалиинди улупру номерарикан тешкил дапIнайи «Пягьливнар» кIуру  программайиинди ккебгънийи.

Фестивалиъ Индияйиан, Ирандиан, Чехияйиан, Словакияйиан, Сербияйиан, Казахстандиан дуфнайи коллективари уч духьнайидар чпин халкьарин яратмишарихъди таниш гъапIну. Шадвалин мяракайиъ Дербент шагьрин глава Хизри Абакаров, шагьриъ айи вари театрарин вакилар, халкьдин творчествойихъ юкIв хъайидар иштирак гъахьну.

Гьацира му йигъан халкьарин художествойин выставка – ярмаркара тешкил дапIнайи. Дупну ккундуки, мицдар серенжемари жара миллетарин вакиларихьна, дурарин культурайихьна гьюрматлувалиинди илтIикIуз улупуру ва ихь дагълу юрднахьна вуйи маракьлувал артухъ хьуз гъитру.