Аьхиримжи йисари ихь гьюкуматдин образование-йин цирклиъ духьнайи дигиш`валариинди арайиз дуфнайи ЕГЭ-йин имтигьянариин рази дарудар гизаф гъахьнушра, Урусатдин жюрбежюр аьхю шагьрариъ заан образованиейин тешкилатариъ чпин аьгъювалариинди урхуб давам гъапIу ва апIурайи ихь халкьдин баяр-шубарра цIиб адар.

2017-пи йисан «Таба-сарандин нурар» газатдиъ Урусатдин урхбан жюрбежюр тешкилатарин арайиъ «Сагъламвал» кIуру номинацияйиъ 1-пи йишв гъадабгъу ихь ватанагьли, Тамбов шагьрин медицинайин институтдин студент, Къужник гъул`ан вуйи Мурад ТIаибовдикан гъибикIнийча.

2018-2019-пи урхбан йисан, Г.Р. Державиндин ччвурнахъ хъайи медицинайин институтдин тарихдиъ сабпи ражари вуди, 5-пи курснаъ урхурайи студентарин илимдин тешкилатдин вакил Мурад ТIаибов Урусатдин Федерацияйин Президентдин стипендияйиз вуйи вари урусатдин конкурс-диъ гъалиб гъахьну.

Президентдин стипендия урхбаъ, илимдиъ ва инновацйирин ляхниъ лап заан дережайин аьгъювалар ва хъуркьувалар айи студентаризна аспирантаризтIан туврайиб дар. Гьацира му стипендия Урусатдин илимдинна заан образованиейин Министерствойи тяйин апIурайиб ву.

Ихь ватанагьли, табасаран драмайин театрин лайикьлу артист Аьгьмед ТIаибовдин бицIину гъардаш Мурад му гьядисайихъди тебрик апIури, дугъаз гележегдиъ хъана аьхю хъуркьувалар ккун апIураза. Му жигьиликан инсанарин гъайгъушнаъ айи, намуслувалиинди чан вазифйир тамам апIру заан дережайин пишекар шлувалиин умудлу вуза.