Февраль вазлин эвелиан хъюгъну, ихь республикайин образованиейин тешкилатариъ багъри чIалариз бахш дапIнайи жюрбежюр къайдайин серенжемар кIули гъягъюра. Ихь гъулариъ яшамиш шулайи мялимаризна баяр-шубаризси дарди, шагьрариъ айидариз бабан чIалнан дарсариъ читинвалар алахьура. Гизафси баяр-шубарихьан ихь кьюжли сесер пуз шуладар ва дурар багъри чIалниинди улхруган, урус халкьдин вакиларин нугъат ебхьуру. Мициб гьялну хизандин айитI багъри чIалниинди гафар дарапIрайивал тасдикь апIура.
Вушра, шагьрариъ лихурайи мялимари чпихьан удукьруб апIура. Февралин 9-пи йигъан Дербант шагьрин 18-пи нумрайин мектебдиъ табасаран чIал киврайи Сарида Семедовайин тешкиллувалиинди ва гьацира чIалнан мялим Эльмира МутIалибовайин кюмекниинди му мектебдиъ «Багъри чIал – ихь девлет» кIуру серенжем кIули гъубшну. Му серенжемдиъ иштрак’вал апIуз ихь чIалниинди бикIурайи шаирар Шюшеханум Мягьямедова, Эльмира Аьшурбегова, Гъизейбат Гьяжиибрагьимова, Минара Гьяжиева ва шагьрин мектебариъ ихь чIал киврайи мялимар гъафну. Табасаран поэзияйиин юкIв али Сарида Семедовайи серенжем эсер апIруси Юсуф Базутаевдин «Багъри чIал» кIуру шиир урхбиинди ккебгъну.
Жюрбежюр классариъ урхурайи баяр-шубарира серенжемдиз дуфнайи шаирарин шиърар устадвалиинди гъурхнийи ва мяълийирра гъапIнийи. Хъа шаирари баяр-шубариз чпин уьмрикан ктибтну ва цIийи шиърарра гъурхну.
15 йисандин арайиъ ихь юрднахьан ярхла вуйи Мурманск шагьриъ яшамиш духьну, 3 йис улихьна чан хизандихъди Дербент шагьриз хъадакну дуфнайи мялим Сарида Семедовайин ихь чIалнахьна вуйи маракьлували, баяр-шубариз чIал улупбан бадали, Эльмира МутIалибовайихъди сабхилди зигурайи чарйири юкIв шад апIуру.
Серенжемдиъ иштирак гъахьи мектебдин директор Низами Юзбеговди, баяр-шубари чIал ужуди ахтармиш апIбан бадали, чан терефнаан вари лазим вуйи уьлчмйир кьабул апIура. Думу учвра ихь халкьдин вакил ву.
«Узу чIал ахтармиш гъапIундаршра, ихь чIал ужуди аьгъязуз. Узуз ихь баяр-шубариз чIал аьгъюди ккундузуз. Гьар вахтна абйир-бабарихъди чIалнан гьякьнаан сюгьбатар гъахури шулза. Дурари чпин бицIидариз дагъустан литература ахтармиш апIуз ихтияр тувуб тIалаб апIури шулу. Багъри чIал аьгъю апIувал ужу вуйивалин гъавриъ адрудар гъавриъ тIаувал ич вазифа ву»,
– гъапну Дербент шагьриъ бабкан духьну, Казахстандиъ аьхю гъахьи Низами Залбеговичди. Гьацира мектебдин завуч Буньямин Гьяжиевра ихь чIал ужуди аьгъюр ву. Шаир Эльмира Аьшурбеговайи гъапиганси, му мектеб табасаранарин мукьсиб ву. Ихь бицIидарра мушваъ гизаф а.
Мектебдиъ багъри чIалнахьна вуйи маракьлували рази апIуру. Мектеб дарсариъ ва баяр-шубарихъди мицдар серенжемар кIули гъахруган ишлетмиш апIру пособйирихъди тямин дапIна, мялимари, цIийи технологйирра ишлетмиш апIури, урхурайидар Табасарандин табиаьтдихъди, культурайихъди ва тарихдихъди таниш апIура.
Серенжем Эльмира Аьшурбеговайин «Дуствалин мяъли» кIуру мяълийиинди ккудубкIну. Му йигъан мяракайиъ иштирак гъахьи шаирариз 21-пи февралиъ, багъри чIалназ бахш вуди, хъана кIули гъабхру серенжемдиз теклиф гъапIну. Мицдар серенжемар, баяр-шубаринси, мялимаринра, шаираринра кьаназ кIваинди гъузру, ва дурари артмиш шулайи ихь наслар багъри чIалнахьна гьюрматлуди янашмиш хьуз гъитру.
