Февралин 10-пи йигъан ихь уьлкейиъ ватандаш авиацияйин пишек-рарин Йигъ къайд гъапIну.
Урусатдин варитIан кьибла терефнаъ ерлешмиш духьнайи ихь республикайиз авиацияйин эгьемиятлувал лап аьхюб ву. Мягьячгъалайин аэропортдиз кьюб ражари Советарин Союздин Игит Аьгьмед-Хан Султандин ччвур тувна. Му аэропорт сабпи классдин дережайин аэропортси гьисаб апIура, ва думу, ватандаш авиацияйилан савайи, РФ-дин ФСБ-йи ва РФ-дин МВД-йира ишлетмиш апIура.
Гъи Дагъустандиъ ватандаш авиация мюгькамди артмиш шула: аэровокзалин комплекс, самолетар дурсру ва гъудужвру рякъ рас апIура, Мягьячгъалайин аэропортдин вари халкьарин терминал тикмиш апIура. Гъубшу йисан Мягьячгъалайин аэропортди 1 миллионна 290 агъзур кас мина-тина гъухну. Му планламиш дапIнайи улупубтIан 90 агъзур пассажириинди, хъа 2017-пи йисандин улупбарихь тевиган, 200 агъзурииндикьан артухъ ву. Му хъуркьувал гьаму цирклиъ лихурайи гъуллугъчйирин баркаллу зегьметниинди гъадабгънайиб ву.
Хъа фукьан хъуркьувалар ашра, аэропортдин кIулиъ айидарин улихь агьалйирин игьтияжар гьуркIбан ляхниъ культура за апIбан, завун транспортдиъ хатIасузвал уьбхбан ва гьял дапIну адру жара месэлйир гъузра.
Агьалйирикан Мягьячгъалайин аэропортдиъ игьтияжар бегьемди гьуркIри адруваликан кми-кмиди ебхьуру. Гизаф касар аэропортдиъ айи кафе-буфетариъ кьиматар лап багьади вуйиваликан, гьяжатхана либхури адруваликан, аэропортдиз гъафиган, машин дебккру йишв къайдасуз гьялнаъ айиваликан улхури шулу. Хъа улихьнаси сар ватандашди, Москвайиз рейс кьяляхъ гъапIган, чав ярхи йишв шартIар адру аэропортдиъ адапIуваликан, мицисдар къайдасузвалар Мягьячгъалайин аэропортдиътIан даршлуваликан ктибтнийи.
Ватандаш авиацияйин гъуллугъчйирин ляхин гизаф жавабдар ва хатIалуб ву. Дурари чпин вазифйир лайикьлуди тамам апIура. Хъа жилиин лихурайи пишекрарира чпин ляхин лазим вуйиганси кIулиз адагъуйиш, лапра ужуди хьибдийи.
Гьюрматлу ватанагьлийир! Мягьячгъалайин аэропортдиъ учвуз алахьу читинваларикан ихь газатдин редакцияйиз бикIай. СатIиди аэропортдин пишекрарин ляхниз тясир апIидихьа.
