«Йиз багъри гъул» конкурс

Хюрикк гъул Табасарандин аьхю гъуларикан саб ву. Думу гизаф уткан йишв’ин ерлешмиш дубхьна. Мушваъ дуланмиш шулайи инсанар лихуз аьшкь айидар ву. Ич гъулаъ гакIвлин муччврар апIру, палтар дирхру, гъвандин ва гакIвлин устйир айич.

Хюрккарин дишагьлийири улихь вахтари масккурариъ халачйир урхуйи, гьамус гьарсари чпин хулариъ халачйир урхуру. Му гъулаъ улихь вахтариан мина айи ужудар аьдатар уьрхюра. Гьаддиз мушваъ ужуб деуб-гъудужвуб, гьюрмат-хатур, аьхюрин гафназ фикир тувуб ва абйир-бабарихъ хъпехъуб йигълан-йигъаз артухъ шула. Хюрккарин гъул чан аьлимарииндира машгьур ву.