Улихьна йигъари Хив райондин администрацияйиъ райондин глава Ярмет Ярметовдин регьберваликкди нубатнан совещание кIули гъубшну.
Администрацияйин образованиейин отделин кIулиъ айи Казбек Къазиевди чан улхбаъ мектебариъ ва бицIидарин багъариъ гъахурайи расвалин ляхнарикан ктибтнийи. «Вари мектебариъ ва бицIидарин багъариъ сабси расвалин ляхнар кIули гъягъюра. Дурар июлин аьхириз ккудукIиди. Анжагъ Хиварин, ЦIийи Фрюгъярин ва Мажвгларин кьялан мектебариъ расвалин ляхнар августдин аьхириз давам хьиди. Му шубби мектебариъ гьарсабдиъ кью-кьюб класс лап утканди ккабалгура ва дурарикан образованиейин центрарин классар апIура. Душваъ математика, информатика, технология, физкультура ва ОБЖ предметариан аьлава дарсар гъахиди. Дидланра савайи, Мажвгларин кьялан мектеб «150 мектеб» проектдин конкурсдиъ гъалиб гъабхьну, ва гьамусяаьт дидин гъваъ, вари классарин полар таза алаура.
Расвалин ляхнар гъахурайи вари мектебариз душну, агьвалат фициб вуш, ахтармиш гъапIунза.
Тикилишчйири урхбан йис ккебгъайиз вари ляхнар ккудукIурча кIури, гаф тувунзуз. Гьамусяаьт гьацира ЦIудухъ ва ЗахитI гъулариъ цIийи мектебар дивра. ЦIудхъарин гъулаъ диврайи мани гьавайиинди вуйи отопление, мани пол ккайи гьяжатхана, хилар жикIру йишв – вари мектебдин айитI хьиди», – гъапнийи К. Къазиевди.
Дугъу ЕГЭ-йин натижйириканра мялумат тувнийи. Хив райондиъ 2018-2019-пи урхбан йисан 11-пи класс ккудукIу 144 касдикан 4-ри урус чIалнан ва 8 касди математикайин ЕГЭ тувундар. Шубур выпускник гъизилин медалин сагьибар гъахьну, 35-40 выпускникди вузарик, ва 60-ри ссузарик кучIвуз документар тувна.
Хъасин райондин глава Ярмет Ярметовди мунициалитетдин рякъярин гьялнакан ва зирзибил гъабхбан гъякъи тувбан учIру месел-йир гъитIирккнийи.
«Узу саб ляхниин аьламат вуза: ихь ватанагьлийири гьяйиф дарапIди телефондихъ хъивуз, интернетдиз, чпин жюрбежюр ляхнариз вазлин арайиъ агъзрариинди пулар харж апIуру. Хъа жвуву убгурайи газран, аквнан вая зирзибил гъабхру машиндин пул тув гъапиган, гьаз-вуш аьгъдариз, дурарин жандиъ мяхъ адабхъуру. Гьамциб аьгьвалат ву вари йишвариъ, гьадму гьисабнаан ихь райондиъра. Вазлин арайиъ кьюб-шубубан хъархъас гъабхурайи машиндин ясана думу гъабхурайи касарин пул тутрувди гъибтуз фици шулу? Анжагъ саб Хирижв гъул ву ми-мидарди 100 процентдихьна зирзибил гъабхбан пул туврайиб. Хъа имбу йишвариъ 30-35 проценттIан дар. Мидланра савайи, райондин агьалйириз, зирзибил абхьуз контейнерар дивну ккунди а. Узуз контейнерар дивуб ужуди рябкъюри адарзуз. Фицики вазли машин гъюру йигъар ухьуз варидиз мялум вухьуз. Гьаддиз вариди удучIвну, ихь рякъ-хул улиъ уьбхюри, жвуван раккнихъ йишв марцц апIури, чIюрхяр айи шишал машиндиъ ипуз уч апIури, ахьа. Хъа челгер дивиш, гьарури, чаз мажал ккабхъубси, фуну вахтна вушра дурариъ зирзибил абхьуз хъюгъиди, хъа хуйир-гатйири, мал-къарайи думу рибгъури-крибгъури, чиркинвалар гизаф хьиди. Чан раккнихь зирзибил абхьру челег дивну шлиз ккун шулу, учвра хьадан вахтна?! Гьич саризра! Гьаддиз узу гъуларин администрацйирин главйириз ва депутатариз, му ляхнин гьякьнаан агьалйир гъаврикк ккауб табшурмиш апIураза», – гъапнийи райондин кIулиъ айири.
Ярмет Ярметовди Хиварин гъулан администрацияйин глава Наилаханум Агъасиевайихьна илтIикIну, дугъкан Хив гъулан, Олег Кошевой мягьялиан гъадабгъну Абумуслим Жяфаровдин мягьялиз гъяйиз, гъулан агьалйириз чпин канализацияйин турбйир вахтниинди гьюдюхюз табшуругъ тувувал ккун гъапIнийи. «Даршсана администрацияйи асфальт таза апIбан кьяляхъ, хъасин нивкI’ан уягъ духьну, думу дабтIури, рякъяриан канализацйирин турбйир гъахуз хъюгъру», – гъапнийи главайи.
