Цци хьадну Дербент шагьрин Набережнайихъ, шагьрин агьалйир ва дуфнайи хялар йишв`инна уч апIури, жюрбежюр шадвалин мяракйир кми-кмиди кIули гъягъюра. Ихь кюгьне шагьриз гъафидар, гъюрудар Кьибла Дагъустандин халкьарин культурайихъди, тарихдихъди таниш шула.
Июлин 26-пи йигъанра му йишв`ина гизаф инсанар уч духьнайи. Мушваъ Дагъустан Республикайин Конституция кьабул гъапIхъантина 25 йис ва Дербент шагьриъ айи ТРК «Рубас» ООО арайиз гъафихъан мина 20 йис хьпахъди аьлакьалуди сабхилди вуйи шадвалин мярака кIули гъубшну. Му серенжем шагьрин культурайин управлениейин отделихъди сабхилди «Рубас» телекомпанияйина табасаран драмайин театрин коллективди тешкил гъапIну.
Мяракайин эвелиъ гьюкуматдин ялхъвнарин «Каспий» ансамблин артистари чпин устадвал улупнийи, хъасин мярака кIули гъабхурайи Дагъустан республикайин лайикьлу артист, мяълийирин устад Руслан Пирвердиевди серенжем абццуз шагьрин главайин заместитель Видади Зейналовдиз гаф тувну.
Шагьрин администрацияйин терефнаан уч духьнайидар тебрик апIури, Видади Вагифовичди 26-пи июль Конституцияйин йигъси, ихь дагълу халкьарин машкварсира тарихдиъ убчIвнайибдикан гъапну ва му йигъахъдиси, «Рубас» ТВ компанияйин коллективра юбилейихъди тебрик гъапIну.
Гьацира, серенжемдиъ мяълийирин устадари урус ва ихь милли чIалариинди мяълийир гъапIну, ялхъвнарин ансамблйирин коллективарира чпин устадвал улупну. Гьацира, му йигъан уч духьнайидар шагьрин культурайин отделин начальник Нармина Балоглановайи, табасаран драмайин театрин директор Аьлимурад Аьлимурадовди, «МЕГА» кIуру ариш-веришдин хулан директор Айваз Рамазановди тебрик гъапIну. Дупну ккундуки, му мярака тешкил апIбаъ ихь театрин пишекрари лайикьлу пай кивну – Мягьямедзакир Рамазановди, Бикеханум Ражабовайи ва ихь эстрадайин артистар Марьям Кьазиевайи, Аьбдулла Мирзакеримовди, Альфия Мурсаловайи гьевеслу мяълийир гъапIну.
Ихь гьюкуматдин экономика жигьатнаан читин вахтна чпин ляхин ккебгъу «Рубас» телекомпания, му йисарин арайиъ ужудар натижйир улупури, артмиш гъабхьну. Гьацира, гьар вахтна уьмрин читин гьялнаъ айи агьалйириз, хизанариз кюмек тувру рягьимлувалин серенжемариъ Айваз Рамазановдихъди сабхилди, Бесханум Гьялимовайин коллективра иштирак шула.
Чан улхбаъ телекомпаниейин кIулин директор Бесханум Уьмаровнайи сабпи йигълан мина чахъди сабхилди му рягьят дару цирклиъ ляхин апIуз хъюгъю ва хайлин вахтна гъилиху Тимур Фейзуллаев кIваин гъапIну. Гьамусяаьт Тимур Мягьямедовичди Санкт-Петербургдиъ «Продакшн» кIуру хусуси компанияйиъ ляхин апIура. Гьацира, Б.Гьялимовайи администратор, рекламайин менеджер Туйханум Аьлимирзаева, «Марс» ва «Рубас» ТВ-йин кIулин редактор Заур Гьяжиев, музыкайин продюсер ва концертарин тешкилатчи Тельман Абукаров, мялуматарин отделин кIулин редактор Артур Умудов, эфирин оператор Эльмар Бабаев кIваин гъапIну ва дурариз гьюрматнан грамотйир тувну.
Серенжемдин аьхириъ мярака кIули гъабхурайи Руслан Пирвердиевди му кьюбиб юбилеярин серенжем ужуб дережайиъди тешкил апIбаъ ва гъабхбаъ асас роль уйнамиш гъапIу «МЕГА» хулан директор Айваз Рамазановдиз, «Елена» кIуру хусуси салондин руководитель, духтир-косметолог Елена Федоровайиз, «Кавказ» ресторандин директор Бег Гереевдиз, Чинар гъулан администрацияйин глава Азад Герейхановдиз, «Умка» кIуру бицIидарин мяракйир тешкил апIру тешкилатдин коллективдиз ва му мяракайиз гъафидариз варидариз чухсагъул мялум гъапIну.
ТРК «Рубас» ООО-йин коллектив «Табасарандин нурар» газатдин редакцияйин терефнаан юбилейихъди тебрик ва дидиз гележегдиъра хъуркьувалар ккун апIурача!
