Майин 24-пи йигъан удубчIву «Табасарандин нурар» газатдин урус чIалниинди вуйи «Годекан» машнаъ «Дирбаш педагог, зурба аьлим, жямяаьтлугъ кас» кIул тувнайи Дагъустандин государственный медицинайин университетдин профессор Мягьямед Аьгьмадпашаевич Ризахановдин 80-йисаз бахш дапIнайи йиз макьала чап дапIна.

 

Гъубшу гьяфтайиъ адлу аьлим М.Ризаханов Дагъустан Республикайин глава В.Ва-сильевди «РД-йин илмин лайикьлу деятель» кIуру заан ччвурназ лайикь хьувалихъди тебрик гъапIну.

Мягьямад Ризахановди илмин цирклиъ гъазанмиш дапIнайи хъуркьувалар, шаксуз, заан кьиматназ лайикь ву. Дугъу 1970-1985-пи йисари Дагъустандин государственный университетдиъ ижми шей’арин физикайин кафедрайин ассистентди, аьхюну преподавателди, доцентди, кафедрайин заведующийдин вазифйир, уьмуми физикайин кафедрайин профессорин вазифйир тамам гъапIну.

1985-пи йисан конкурсдин бинайиинди ДГМА-йин физикайин кафедрайин заведующийдин гъуллугънаъ тяйин апIуру. Гьамусра думу гъуллугънаъ лихура.
Физикайинна математи-кайин илмарин доктор М.Ри-заханов 1988-пи йисан профессорвалин ччвурназ лайикь гъахьну. Дугъаз 1980-пи йисан «СССР-ин изобретатель» ччвур тувну; физикайин илимдиъ асуллагь цIийи ачмиш’валар апIбаз лигну, аьлим М.Ризахановдин ччвур завуъ айи саб хядраз тувна. Дугъу тербия туву аьлимар вари дюн’яйин пIипIариъ лихура.

Жямяьтлугъ ляхнариъра Мягьямад Ризахановдин пай аьхюб ву. Хайлин йисари думу «Табасарандин жямяаьтлугъ» сиясат гьяракатнан регьберди гъахьну. Саб кьадар дугъан макьалйир СМИ-йин мащариъ чап дапIна. Думу ляхин бегьерлуди гьамусра давам апIура.

Мягьямад Агьмадпашаевич Ризаханов чан юбилейин йисан «Дагъустан Республикайин илмин лайикьлу деятель» ччвурнахъди кIваантIан тебрик апIури, дугъаз жандин мюгькам сагъвал, ляхниъ, илимдиъ, жямяаьтлугъ цирклиъ хъана заан хъуркьувалар ккун апIурхьа.