Июлин 29-пи йигъан Табасаран райондин администрацияйиъ гъуларин поселенйирин главйирра, райондин депутатарра уч дапIну, муниципалитетдин глава Мягьямед Къурбановди яркьу совещание кIулиъ гъубхну.
Совещаниейиъ жюрбежюр месэлйир гъитIирккнийи, гьадму гьисабнаан райондиъ аьхиримжи вахтна зирзибил гьадабгъбан учIруди дийибгънайи месэлара.
Райондин администрацияйин пресс-гъуллугънаан учуз туву мялуматариинди, «Экологи-ка» региондин оператори, зирзибил уч апIбан ва думу райондиан гъабхбан чаина гъадагънайи вазифйир тамам апIурадар. Хъа гьадму саб вахтна райондин вари бюджетдин тешкилатари йисандин сабпи гьацIаз зирзибилихъан пул тувна. Амма совещаниейиъ иштирак гъахьи «Экологи-ка» ООО-йин директорин гафариинди, арайиз дуфнайи читин аьгьвалатнан асас себеб Табасаран районди гьамусдиз гъубху зирзибилихъан пул тувнадрувал ву. Бюджетдин идарйири туву пул, «Экологи-ка» ООО-йин вакили мялум гъапIганси, зирзибил гъабхру машинарихъ хъайидарин, хъархъас машинариъ абхьрударин маважибариз вая ГСМ гъадабгъузкьан гьубкIрадар.
Мугъан гафарихъди совещаниейиз уч духьнайи депутатар ва гъулан поселенйирин главйир рази гъахьундайи. Уч духьнайидарин ва райондин жямяаьтлугъдин терефнаан операторин ляхниз кьимат райсобраниейин депутат Къазанфер Мустафаевди тувнийи: «Экологи-ка» ООО-йин, зирзибил гъабхуз ихтияр айи лицензияйилан гъайри, сарун гьич фукIара адар – я зирзибил гъабхру аьхю машинар, я ляхин гьяракатниинди кIули гъабхуз лазим дакьатар, я ужудар пишекрар. Гьаддиз, райондин агьалйирин мурариин сарун хъугъвалра илимдар».
Месэла гьял апIбан натижйир Мягьямед Къурбановди гъивнийи. Дугъу къайд гъапIганси, райондин ва гъуларин поселенйирин администрацйири «Экологи-ка» ООО региондин операторихъди йитIнайи йикьрариъ улупнайи чпин вазифйир бегьемди тамам гъапIну: зирзибил дабхьуз, бетон убзну, тялукь йишвар гьязур дапIна, гъуларин администрацйирин терефнаан операториз лазим вуйи кюмекарра тувра. «Мисалназ, райцентрин кючйириан уч дапIнайи зирзибил гьамусяаьтра Хючна гъулан сельсоветди чпин кьувватариинди гьадабгъура. Хъа пуб лазим вуки, му оператори ихь райондиъ ляхин апIуз март вазлилантIан хъюгънадаршра, чIюрх-чIувалихъан вуйи пул, январин вазлихъан мина гъадабгъура», – гъапнийи главайи.
Дугъу «Экологи-ка» ООО-йин вакилариз Хючна гъулаъ айи 200-дихьна ариш-веришдин идарйирихъди, гьарсаб хизандихъди жа-жаради йикьрар йитIбан теклиф дивнийи.
Совещаниейин аьхириъ кьюбиб терефар мясляаьтнахъна гъафну: «Экологи-ка» ООО-йин вакилари 20 йигъандин арайиъ райондин гъуларин агьалйирихъди, дурар гъаврикк ккаъбан бадали, гюрюшар духну ккунду.
