Августдин 1-ди «Дагъустан» РИА-йин конференц-залиъ Къурбан-байрам машквар къайд апIбахъди аьлакьалу конференция кIули гъубшну.

Конференция ачмиш апIури, РД-йин милли политикайин ва динарин ляхнарин министр Энрик Муслимовди уч духьнайидар улубкьурайи гирами машкврахъди тебрик гъапIну ва, машкврахьна гьязур шули, республикайиъ гъахурайи серенжемарикан ктибтну. Агьалйирин наразивалар гьисабназ гъадагъну, думу йикк масу туврайидарихьна кьиматар за дарапIуб ккун апIури, илтIикIну.

Конференцияйиъ Мягьячгъала шагьрин аьхю мистан имамдин заместитель Мягьямед Къурбандибировди машквран тарихдикан, къурбан апIбан асас къайдйирикан ктибтну.

М. Къурбандибировди туву мялуматниинди, цци Къурбан-байрам августдин 12 йигъан къайд апIиди.