18-пи августдиъ Табасаран райондиъ Рибчрарихъ ерлешмиш дубхьнайи гостиницайинна юкIв улдубчру комплексдиъ урус шашкйириан Дагъустандин 19-пи чемпионат кIули гъубшну.
Урус шашкйириан хусуси касарин ва командйирин арайиъ вуйи чемпионатар гизафси Табасаран райондиъ гъягъюру. Гьаз гъапиш, шашкйир уйнамиш апIуз юкIв хъайидар мушваъ гизаф а, гьацира гьаму улихьна йицIбариинди йисари урус шашкйириан спортдин федерацияйин аьхюдар Табасаран райондин глав-йир вуди гъахьну.
Гьамусяаьт думу федерацияйин аьхюр Дагъустан Республикайин Халкьдин Собраниейин Табасаран райондиан вуйи депутат Алавудин Мирзабалаев ву. Думу турнир 3-йигъан кIули гъубшну. Душваъ иштирак хьуз вари Дагъустандиан шашкйир апIру варитIан ужудар 26 кас уч гъахьнийи. Дурар 11 райондианна шагьрариан вуйи. 19-пи чемпионатин аьхюнур судья Исмяил Исмяиловди гъапиганси, думу талитар швейцарияйин къайдайиинди 9 туриъди кIули гъухну.
Сабпи йигъан дурари блиц-турнир гъубхнийи, думу турнирра, чан асас турнирси, саб партияйиз 9 минут улупну, гъябгъюрайиб ву. Душваъ 1-пи йишв Убуша Ангряевди (Къизилюрт), 2-пи йишв – Мустафа Мягьямедовди (Къарабудагъкент район), хъа 3-пи йишв – Мягьяммад Уьмаровди (Леваши район) гъадагъну. Гьаму 3 касди вари турнириъ гъалибвал гъубхну. Убуша Ангряевди варитIан заан хъуркьувалар улупну – 9-дикан 9 очко гъадагъну. 32-пи йисаъ айи спортдин мастер чахъди шашкйир уйнамиш гъапIу ксариин лап гьииди гъалиб гъахьну. Думу сабпи ражари Дагъустандин чемпион гъахьну, муганайизра дугъу саб-швнубан Урусатдин Кьибла федералин округдиъ гъалибвалар гъадагъну. Гьацира Астрахандиъ гъахьи талитариъра думу гъалибчи гъахьну, думу учвра гьадушв’ан ву. 2-пи йишван сагьиб Мягьямедяли Уьмаровди 7 очко, хъа 3-пи йишваз лайикь гъахьи Мустафа Мягьямедовди 6,5 очко гъадагъну. Командйирин арайиъ вуйи талитариъ, 13,5 очко гъадагъну, Къизилюртдин команда гъалиб гъабхьну.
Къарабудагъкендиан вуйи ва Левашийиан вуйи командйири сабси очкйир гъадагънийи – 11 очко, хъа хъанара зиълан вуйи улупбариз лигну, Къарабудагъкентдин командайиз 2-пи йишв тувну. Табасаран райондиан вуйи команда му ражну гъядябхъну, 3-пи йишвазкьана лайикь гъабхьундар. Швнуб-сабан Дагъустандин чемпионар гъахьи Исмяил Исмяиловдихьанра, Гьяшим Хаирбеговдихьанра чпин заанвал улупуз гъабхьундар.
Турнир ккудубкIру йигъан дидиъ Табасаран райондин глава Мягьямед Къурбановра иштирак гъахьну. Дугъу гъалиб гъахьи касариз медалар, грамотйир ва пулин дакьатар тувну. Командайиинди сабпи йишв гъадабгъдариз кубок тувну.
