Гъубшу гьяфтайин аьхириъ Дербент шагьриъ воркаут спортдиин машгъул вуйи спортсменарин арайиъ 5-пи ражари вуди Дагъустандин ачухъ вуйи чемпионат кIули гъубшну.

 

Чемпионатдиъ иштирак хьуз Дербентдиз спортдин му жюрейиан Кафари Кавказдиъ варитIан гужли спортсменар гъафну. Воркаут спорт фу ву гъапиш, думу кючейин гимнастикаси гьисаб апIура. Аьхиримжи вахтна спортдин му жюре ихь республикайиъ ужуди артмиш хьуз хъюбгъна. Гьарсаб гъулаъ, шагьрариъ воркаут спортдин хусуси майднар тикмиш апIура.

Гьаму йигъан воркаут спортдиан Дербентдиъ гъахьи талитар кьюб номинация-йиан кIули гъушну: «Воркаут Батлы» – фристайлдиан сарна сарди талит гъабхувал ва «Base Wars» – турникдиккан шархьил ккадабгъувал, йишв’ин деъри гъудужвувал, маш кIанаккди дахъну, хиларихьди беден за – ис апIувал ва гьацдар жарадар.

Му жюрейин спортдиан кIули гъубшу чемпионатдин сабпи номинацияйиъ хъади-хъади кьюбпи йисан ихь ватанагьли, Мягьячгъалайиъ яшамиш шулайи Мажвгул гъулан агьали Рамазан Гьяйдаров гъалиб гъахьну. Кьюбпи йишв Ставрополиан вуйи спортсменди гъадабгъну, хъа шубпи йишваз Чечен Республикайиан вуйи спортсмен лайикь гъахьну.

Хъа кьюбпи номинацияйиъ гъалибвалин шубби йишварра дагъустандиан вуйи спортсменари гъадагъну. Мушваъ сабпи йишван сагьиб Дагъустандин Огни шагьриан вуйи Тигран Къарабегов гъахьну, кьюбпи йишв Гергебил райондиан вуйи Султан Уьмаровди гъадабгъну, хъа шубубпи йишваз Хунзах райондиан вуйи Мухидин Амиргьямза лайикь гъахьну. Талитариъ гъалибвал гъадабгъу вари спортсменар багьалу пешкешарихъди ва дипломарихъди лишанлу гъапIну.