Хьадан фасил ккебгъубси, гьар йисан образование-йин тешкилатариъ расвалин ляхнар кIули гъягъюри шулу. Дербент шагьрин мектебар 2019-пи 2020-пи урхбан йисахьна фици гьязур духьнаш аьгъю апIуз ккунди, узу шагьрин ГУО-йин начальник Гюльназ Самедовайихьна илтIикIнийза.
Гюльназ Гьюсейновнайин гафариинди, гъийин йигъаз, кюгьне шагьриъ айи вари мектебариъси, бицIидарин багъариъра расвалин ляхнар кIули духна. Урусатдин «150 мектеб» кIуру проектдик Дербентдиан 5 мектеб кахьну. Дурарин арайиъ 4-пи, 9-пи, 11-пи, 12-пи, 21-пи нумрйирин мектебар а. Му мектебариъ бинайиан вуйи расвалин ляхнар кIули гъягъюра, ва урхбан цIийи йис ккебгъайиз, мектебар гьязур хьиди.
«Шагьрин администрацияйин ва депутатарин Собраниейин къарарниинди 8-пи, 12-пи нумрйирин мектебариъна 20-пи нумрайин бицIидарин багъдиъ бинайиан рас апIбан ляхнар ккергъна, ва ццийин йис ккудубкIайиз, дурар къайдайиз хиди. Гьацира, 1-пи, 19-пи, 21-пи, 25-пи нумрйирин бицIидарин багъариъ майиф бицIидариз вари лазим вуйи шартIар яратмиш апIбан ляхнар кIули гъахури, пандусар дивди, думу багъар методикайин жюрбежюр материаларихъди, ибариз деребхьрудариз лазим вуйи аппаратарихъди тямин апIиди», – мялум гъапIну Гюльназ Самедовайи.
Дугъу тасдикь гъапIганси, образованиейин тешкилатариъ вари расвалин ляхнар кIули гъахбан бадали, шагьрин бюджетдиан 3 миллион манат жара гъапIну. Гьамусдиз вари мектебарна бицIидарин багъар, хатIасузвал уьбхбан гьякьнаан ахтармиш дапIну, кьабул гъапIну ва шагьриъ тешкил дапIнайи комиссияйин членари актарихъ къулар гъизигну. Думу комиссияйин председатель шагьрин главайин заместитель Видади Зейналов ву. Гьацира му комиссияйиъ роспотребнадзорин, образованиейин, АТК-йин, ОВД-йин, МЧС-дин пишекрар иштирак шула.
Къайд дапIну ккундуки, Дербент шагьриъ бицIидариз вуйи образованиейин тешкилатар гьуркIри адар. Му месэла гьял апIбан бадали, 2020-пи йисаз «Аэропорт» микрорайондиъна Кьибла постнан аьтрафариъ мектебарихъди сабси бицIидарин багъарра дивувал планламиш дапIна.
«Вари мектебар лазим вуйи китабарихъди тямин апIбан бадали, сач мектебариз цIийи китабар гъахнийи, гьацира ццийин йисанра учу «Просвещение», «Дрофа» чапханйириз тувнайи китабарин заказарра урхбан йис ккебгъайиз хъуркьди. Мидланра гъайри, пуз ккундузузки, шагьрин мектебариз физикайиан, химияйиан, биологияйиан дарсар кивру мялимар ва филологар герекди ву. Баяр-шубарин аьгъюваларикан улхуруш, йислан-йисаз абйир-бабари чпин баяр-шубариз артухъдиси фикир тувуз хъюгъна. Шагьриъ 70 баллтIан артухъ баллариз ЕГЭ тувдар гизаф а. Гьаддиз узу шагьрин глава Хизри Мягьямедовичдиз зигьимлу баяр-шубариз жаради мектеб абццбан теклиф гъапIунза. Дициб мектебдиз Дербент шагьриъ дараматарра а. Улихьна йисари абйир-бабар адру йитим баяр-шубарин хал вуди гъабхьи дарамат гьамусяаьт ичIиди а. Думу дарамат рас дапIну, душваъ мектеб абццуз шулу. Казань ва Краснодар шагьрариъ, гьацира Мягьячгъалайиъ дицдар мектебар а. Дициб мектебдиъ лихру мялимарра ужудар аьгъювалар ва тажруба айидар духьну ккунду», – давам гъапIну йиз сюгьбатчийи.
Дербент шагьриъ гизаф йисариинди гьял дарапIри гъахьи читин месэлйир жикъи вахтнан арайиъ гьял апIури, вари цирклариин гюзчивал гъабхурайи Дербент шагьрин глава Хизри Абакаровди мициб мектеб абццбаз фикир тувур кIури, умудлу вуза. Гъит, йислан-йисаз ихь республикайин баяр-шубариз ужудар шартIар айи бицIидарин багъарна мектебар артухъ ишри. Хизри Мягьямедовичди гъабхурайи ляхнин къайдайиз ихь республикайин шагьрарин жара главйирира фикир туври гъахьнийиш, ихь яшайишдиъ ужудар дигиш`валар хьуз кьан апIидайи.
