Ухьуз мялум вуйиганси, гъулариъ яшанмиш шулайи агьалйирин арайиъ лап учIруди дийигънайи суаларикан саб штухъди аблакьалуб ву. Гьелбетда, цIиб улихьнаси дарди, гъи варидарин хулариъ, гьяятдиъ шид а. Белки, гьаддиз йислан-йисаз шид кьитра шулашул. Гъулан кьялаз гъюрайи саб штукан варидариз мадар апIуз ккунду гъапну кIури, думу саб булагъдианра удукьуз шлу ляхин дар.

 

Гъирагъдиан ва гьюкуматдин терефнаанра чпиз кюмек адрувал субут апIури, саб хайлин гъулариъ айи агьалйири, метлеб саб вуйивал гюзет дапIну, гъулан чIурдиин ерлешмиш дубхьнайи булагъдиан 7-8 хизандигъна шид хура. Булагъдиан шид хпалан кьяляхъ, дюзвал ужуб мутму ву кIури, дурари шид уч апIру цистернайин улихь варидариз туртлар кади рукьан кьути гьязур дапIну, дид`ан гьаруриз спичкайин кьалсиб, ручкайин кIакIсиб шид деебтура. Хъа гьарури чан хянакк лазим вуйи саягъниинди шид уч апIру йишв ккабалгури, дид`ан хулаз ишлетмиш апIура. Даршсана сари гизаф, сари цIиб шид ишлетмиш апIури, сар-сарикан аьсси дархьуз, арайиъ улхуб-рахуб дархьуз, ужуб мясляаьтнан тереф уьбхюри, гьамциб йикьрарнан ляхин кIули гъабхура.

Агьалйирин гафариинди, эгер гъул`ан удучIвну душнайи, ужуди яшанмиш шулайи касари пулин дакьатарихъди гъулаз чпихьан шлу кюмек гъапIнийиш, ясана гьамускьан гьюкуматдин терефнаан сабцIиб кюмек гъабхьнийиш, саб хайлин булагъар кидикьну, дурар вари сабси гъул`ина хуз шуйи. Гьадмуган гъулаъ гьаммишан шидра ади шуйи. Хул хътипру тракториз, штуз гуж апIру насосдиз, шид хру шлангиз, шид уч апIуз ипру цистерниз ва му месэлйихъди аьлакьалу ляхнариз пулин дакьатарин терефнаан гизаф кюмек лазим ву. Хъа гъуландарихьан му харжар апIуз удукьудар.