Августдин 22-пи йигъан Мягьячгъала шагьриъ «Дуствалин Хулаъ» образованиейин гъуллугъчйирин гьар йисан тешкил апIру августдин совещание кIули гъубшну.
Думу совещаниейиъ РД-йин Глава Владимир Васильев, РД-йин Халкьдин Собраниейин Председатель Хизри Шихсяидов, РФ-дин образованиейин Ми-нистерствойин ихтиярарин Департаментдин кIулиъ айи Светлана Нуждина, РД-йин Правительствойин Председателин заместитель – РД-йин образованиейинна илимдин министр Уммупазиль Уьмарова, РД-йин министерствйирин, идарйирин, тешкилатарин кIулиъ айидар, районарин главйир, образованйирин управленйирин начальникар, вузарин ректорар, мектебарин директорар, мялимар иштирак гъахьну.
Совещание ачмиш апIури, Уммупазиль Уьмаровайи Дагъустан Республикайин образованиейин улихь дийигънайи важиблу месэлйир арайиз адагъну. Дугъан гафариинди, министерствойин улихь хьайи асас вазафа – ихь бицIидариз варидариз сабси тувру заан дережайин образование яратмиш апIувал ву. Гъийин йигъан му ляхниз вари кьувватар, проектар, программйир диш дапIна.
Чан докладдиъ У. Уьмаровайи къайд гъапIганси, заан дережайин образование тувувал – уьлкейин жямяаьтлугъдин хъуркьувал ву.
«Образование» Милли проектдин дахилнаъди кIули гъахурайи гьяракатариз асас вуди, республикайин мектебар шубуб сменайиъди урхбан къайдайилан улдучIвиди. Гъийин йигъаз республикайиъ шубуб сменайиъди лихурайи мектебариъ 2642 бицIири урхура.
2021-пи йисаз Дагъустан-диъ 57 мектеб тикмиш дапIну ккудукIиди. Гъи республикайин гизаф мектебариъ мялимар хьуркIри адрувалин учIру месэлара арайиз дуфна. Гьамусяаьт республикайин мектебариз 400-тIан артухъ мялимар гьуркIрадар. Му месэла гьял апIувал метлеб вуди «Земский учитель» проект гьяракатнаъ ипна. Му проектдин бинайиинди цци 50 мялим хьуд йисазди гъулариз ляхин апIуз гъягъюз рази гъахьну. Дурариз гьаруриз саб миллион манат тувра. Гьадрарикан 4 мялим Табасаран райондин ЦIанак ва Бургьанкент гъуларин мектебариз лихуз гъягъюра. Гьаддихъди сабси, республикайин мектебариъ хайлин йисари вафалуди зегьмет зигурайи мялимарра гизаф а. Совещаниейиъ РД-йин Глава Владимир Васильевди швнур-сар мялим «Республикайин лайикьлу мялим» гьюрматлу ччвур тувбиинди лишанлу гъапIну. Гьадрарин арайиъ Табасаран райондин Хючна гъулан 2-пи нумрайин мектебдиъ математикайин дарсар киврайи мялим Мурад Максимович Балабеговра а.
Гъябгъюрайи йисан 1-пи сентябрихъан башламиш дапIну, республикайин гъуларин 168 мектебдин бинайиин, «Деврин мектеб» Федералин проектдин дахилнаъ айи «Образование» Милли проектдин программайиз асас вуди, урхурайи баяр-шубарин аьгъюваларин дережа за апIуз диш дапIнайи «Точки роста» центрар арццди.
«Дагъустандин Глава Владимир Васильевдин жягьтлувалиинди гъубшу йисан «100 мектеб» кIуру проект гьяракатнаъ ипнийхьа. Гьаму йисан думу проектди «150 мектеб» къайдайииъди ляхин давам апIура. Дидик республикайин шагьрарин 44, хъа районарин 217 мектеб кахьну. Образованиейин думу тешкилатариз пулин дакьатарин гьякьнаан, республикайин ва муниципалин бюджетарианси, спонсорарира кюмек апIура», – гъапну министри.
ЕГЭ-2019 кампанияйикан улхури, министри чан докладдиъ къайд гъапIганси, имтигьнар къайда чIур дарапIди гъурхну. ЕГЭ тувру асас вахтна 12452 выпускник имтигьнариъ иштирак гъахьну. Имтигьнарин натижйир йислан-йисаз заандар шула. Мисалназ, жюрбежюр предметариан 23 ученикдихьан ЕГЭ 100 баллиз тувуз гъабхьну.
Совещаниейиъ гьацира мектебдиз улихьна вуйи образованиейин, аьлава образованиейин, зигьимлу бицIидариз кюмек тувбан, цифровизацияйин, квантовый къайдайин, китабарин тяминвалин ва жара месэлйирикан гъулхнийи.
Аьхириъ Владимир Васильевди, Уммупазиль Уьмаровайи ва серенжемдиъ удучIвну гъулху жара касари мялимар, мектебариъ урхурайи баяр-шубар, дурарин абйир-бабар улубкьурайи урхбан цIийи йисахъди тебрик гъапIну.
