Садпи сентябриъ аьгъюваларин Йигъахъди аьлакьалу вуйи шадлугънан линейка Дербент шагьрин «Вари дюн’яйин культурйирин гимназия» кIуру 18-пи нумрайин мектебдиъ кIули гъубшну.
Шагьрин кючйир мектебдиз алабхьру жюрейин палат алабхьну, хилиъ кюкйирин кунцIар дидисну, мектебдиз, гимназияйиз гъягъюрайи баяр-шубарин дестйири ацIнайи. Дурарикан хайлиндарихъди, иллагьки сабпи ражари сабпи классдиз гъягъюрайи бицIидарихъди, чпин абйир-бабарра хъайи. Ихь гележегдин насил гьаци шадди, гьевеслуди мектебдиз гъягъюри гъябкъиган, юкIв шад шуйи. Садпи сентябриз бахш вуйи шадвалин линейка думу мектебдин мялимар вуйи Вера Агъакеримовайи, Мина Качаевайи, Гюльназ Аьликперовайи ачмиш гъапIний. Думу серенжемдиз, урхурайидартIан савайи, мялимар, жюрбежюр пишекрар, шагьрин образованиейин управлениейин начальник ва жара жавабдар касар гъафний. Серенжемдиъ удучIвну улхуз сабпи гаф мектебдин директор Низами Юзбеговдиз тувний. Дугъу уч духьнайидар аьгъюваларин Йигъахъди тебрик гъапIний, чпин мектебдин хъуркьуваларикан гъапний. Низами Залбеговичди чан улхбаъ мектебдин ккудубшу йисандин натижйирикан ва цIийи урхбан йисан улихь дийигънайи месэлйирикан ва гьацира чпин мектебдиъ урхурайи баяр-шубарин, дурариз аьгъювалар туврайи мялимарин хъуркьуваларикан, цIийи урхбан йисаз мектебдин дараматар, классар гьязур дапIну, бицIидар кьабул апIуз гьязурди айиваликан мялум гъапIнийи.
Ухьуз аьгъюганси, сентябрин садпи йигъ ихь уьлкейиъ аьгъюваларин Йигъ ву. Ихь уьлкейин миллионариинди урхурайидар, мялимар думу йигъаз ккилигури шулу. Гьаму йисандин улупбариинди, ихь уьлкейин мектебарин партйирихъ йицIихьуб миллионтIан артухъ, гьадму гьисабнаан сабпи ражну сабпи классдиъ урхурайидар деъну. Ав, думу йигъ, мектебариъ урхурайидаринси, мялимаринси, ихь гьарсарин машквар йигъ ву. Улупнайи мектебдиъ гьар йисан аьгъюваларин Йигъ заан дережайиъди къаршуламиш ва къайд апIура. Думу йигъахьна, мектебдин директор Низами Залбеговичра кIулиъ ади, гьам мялимарин ва техработникарин коллектив, урхурайидар, гьамсана абйир-бабар гьязур шулу. Ав, ихь аьхю шулайи наслин гьеле мектебдиъ имиди гъайгъушнаъ духьну ккунивал дурари гьисс апIуру. Кьюб кIуруб, урхурайидар, иллагьки заан классариъ урхурайидар, китабарихъди тямин апIувал гьамусяаьтна вари мектебариъ зайифди ву. Шадвалин йигъинжагъдиз дуфнайи абйир-бабарик думу месэлайи гъалабулугъ’вал кипрайи. Гьаци вушра, мектебдин директор Низами Залбеговичдихъди сабси, абйир-бабарира урхурайидар китабарихъди тямин апIуз чарйир агура. Дугъу къайд гъапIганси, мектебдин ккудубшу йисандин натижйир харжидар гъахьундар. «Ич мектеб цци 7 выпускникди гъизилин медализ ккудубкIну. Асас предметариан ЕГЭ варитIан заан баллариз тувну. Думу ихь мялимарин вари коллективди гъизигу жафайин натижа ву. Гьелбетда, мушваъ абйир-бабари уйнамиш гъапIу рольра бицIиб гъабхьундар. ЦIий урхбан йис ужудар хъуркьувалар ади ккудубкIуз вари бицIидариз жандин сагъ’вал, ягъурлувал ибшри!» – гъапний директори.
