Сентябрин вазлин 11-пи йигъан Дербентдин педагогвалин колледждиъ Дагъустандин сабвалин Йигъаз бахш дапIнайи серенжем кIули гъубшну. Серенжем колледждин директорин заместитель Ширинат КIаручевайи ачмиш гъапIну.

 

Дугъу иллагьки мялимвалин курсариъ урхурайи студентариз жвуван тарихдикан ва культурайикан аьгъювалар ади ккуниваликан гъапну. Гьацира Ширинат Умалатовнайи гъи студентариз чпин аьгъювалар артухъ ва дерин апIуз мумкинвал айивалиин чан разивал улупну. Хъасин Дербент шагьрин культурайин управлениейин аьхюну пишекар Гюльпери Мирзабалаевайи Дагъустандин игитвалин тарихдикан, хъа кьатI`иди кIуруш, Надиршагьдин кьушмар Дагъустандиъ дагъитмиш апIбакан ва думу гьунарнак Кьибла Дагъустандин миллетари кивнайи пайнакан ктибтну. Дугъу, му гьунар кIваин гъибтбан бадали, культурайин ва литературайин вакилари зигурайи зегьметнакан гъапну. «Таза насларихьна ихь игит тарихдикан вуйи мялуматар рукьбан бадали, тербияйин аьхю кьувват айи «Кьалухъ Мирза» («Эвелин дих») кIуру спектакль арайиз адабгъдариз икрам апIураза», – гъапну Гюльпери Шябановнайи. Дугъу пьесайин автор Эльмира Аьшурбеговайиз, Кьалухъ Мирзайин образ заан дережайиъди шикиллу апIбаз лигну, хайлин гьюрматнан гафар гъапну, ва авториз пьеса фици арайиз гъафнуш ктибтбан теклиф гъапIну. Ихь шаир ва драматург Эльмира Аьшурбеговайи пьеса яратмиш апIбакан ва ихь театр, пьеса хьади, фестивалиъ иштирак хьпакан ктибтну, пьесайин бинайиъ айи тарихдин гьядисйирикан мялум гъапIну ва Кьалухъ Мирзайин ва чан шиърар гъурхну.

Табасаран театрин терефнаан программайиъ айи «Кьалухъ Мирза» спектаклин кьатI ва мяълийир залиъ аьхю аьшкьниинди къаршуламиш гъапIну.

Серенжемдин аьхириъ залиъ деънайи педколледждин студентарира Дагъустан – ихь вари милетарин сатIи ужагъ вуйиваликан ва ухьу гьарсар гьам читин, гьам ужуб йигъан сар-сариз яракар духьну ккуниваликан гъапнийи.