Сентябрин 16-пи йигъан Москвайин Правительствойин Новоарбатский кючейиъ айи дараматдиъ «Финансистарин Йигъ» къайд апIбан дахилнаъди «Репутация-2019» премияйиз лайикьлу гъахьи касар тебрик апIбан серенжем кIули гъубшну.
Лауреатариз премия тувбан бадали, серенжемдиз Урусатдин Банкдин, Урусатдин Федерацияйин финансарин Министерствойин ва жара идарйирин вакилариз теклиф дапIнайи.
«Агьалйирин финансарин савадлувал за апIбак пай кивбаз» номинацияйиъ Дагъустан Республикайин образованиейин ва илимдин Министерствойин манзилнаъди аьгъювалар тувру Центрин директор, ихь ватанагьли Зейдуллагь Юзбеговдизра премия тувну. Дидин гьякьнаан «Табасарандин нурар» газатдин редакцияйиз республикайин образованиейин ва илимдин Министерствойин мялуматарин дакьатарин гъуллугънаан хабар тувну.
Къайд апIувал лазим вуки, РФ-дин Президентдин Указдиинди тяйин дапIнайи «Финансистарин Йигъ» пишекарвалин машкврин дахилнаъди гьар йисан жюрбежюр пешкешар тувра. Диди му пишейин аваза за апIуз ва финансарин институтдиин али хъугъ’вал уьбхюз кюмек тувра.
«Репутация» кIуру пешкеш му пишейин экспертариз тувру. Хъа пешкеш тувбан гьякьнаан къарар, ачухъди сесер тувбиинди пишекарвалин жямяаьтлугъ дестейи кьабул апIбан кьяляхъ, адабгъуру ва натиж-йир экспертарин советди тяйин апIуру.
Зейдуллагь Юзбегов Урусатдин лайикьлу экономист, экономикайин илмарин доктор, М.В.Ломоносовдин ччвурнахъ хъайи МГУ-йин профессор ву.
Гьюрматлу Зейдуллагь Къадималиевич! «Табасарандин нурар» газатдин редакцияйин коллективди уву яв пишекарвалин, дилаварвалин, инсанвалин ерийиз лайикьлу кьимат тувбахъди кIваантIан тебрик апIура. Гъит, Аллагьди увуз мюгькам сагъ’вал, хушбахтлу уьмур туври, халкь бадали уву зигурайи зегьметнаъ хъана аьхю хъуркьувалар ишривуз.
