Телевизор гьарсаб хизандин уьмарат ву гъапишра, йиз кучIал даршул. Ихь уьмриз телевизор гъафихъан мина инсанарин яшайиш ужуб терефнахъинди дигиш гъабхьну. Хъа гьамус Дагъустан Республика цифрайин эфирин телевидениейихъна гъюра. Гъюра гъапиганра дюзди шуладар, фицики республикайиъ цифрайин телевидениейи ляхин апIури саб кьадар вахт дубшна.
Республикайиъ аналогдин телевидениейира ляхин апIура. Октябрин 14-пи йигъан ихь республикайиъра аналогдин сигнал ктIубшвура. Цифрайин телевидениейихъна гъювал, 4 йишваз пай дапIну, февралин вазлиъ ккебгънийи. Ихь аьхю уьлкейин 64 региондиъ «аналог» ктIубшвну, «цифра» улупура, хъа имбу 21 региондиъ «аналог» тяйин дапIнайи вахтнан 4-пи пайнаъ – 14-пи октябриъ ктIубшвуру ва вари уьлке цифрайихъна гъюру.
Республикайиъ гъагъи ва зурба ляхин дапIна. «Эгер инсанариз аналог ктIубшвувал аьгъю дархьиш, – му ухьу гъапIу ужуб ляхин улупувал хьибди!», – къайд гъапIну РД-йин мялуматламиш апIбан, аьлакьайин ва махлукьатлу коммуникацйирин министр Сергей Снегиревди.
Дагъустан Республикайин Глава Владимир Васильевди цифрайин телевидениейихьна улдучIвурайиваликан мялумат адру кас гъидритувалин месэла улихь дивна. Дагъустандиъ, чпихьан цифрайин телевидение хъибтIуз даршидариз кюмек тувбан бадали, лазим вуйи мумкинвалар яратмиш дапIна.
Волонтерарин кюмек аьхюб ву. Дурари Муниципалитетариъ гьарсаб хал, гьарсаб хизан ахтармиш апIура.
Мягьячгъалайиъ Лениндин комсомолин ччвурнахъ хъайи паркдиъ 21-пи сентябриъ «Миллетдин кросс-2019» Вариурусатдин жаргъувалин йигъан спортдин машкврин дахилнаъди ихь республика цифрайин телевидениейихъна гъювализ бахш дапIнайи серенжем кIули гъубшну. Паркдиз Дагъустандин вузариъ урхурайи 200-тIан артухъ студентар уч духьну, «ЦТВ» гьярфар шлу саягъ дийигъну, флешмоб гъубхну.
Серенжем ачмиш апIбаъ дагъустандин спортсменар, РТРС-дин региондин филиалин директор Гь.Сяидов, кIулин инженер А.Акимов, РД-йин Минкомсвяздин вакилар иштирак гъахьнийи.
«Дагъустан Республикайиъ федералин метлебнан программа уьмриз кечирмиш апIури, цифрайин 164 объект тикмиш дапIна: дурарикан 124 цIийидар ва 40 рас дапIнайидар ву. РТРС-дин филиализ, цIийи объектарихьна рякъяр адарди, ляхниъ гизаф читинвалар алахьну, тешкилатди чаз айи мумкинвалариинди 300 километр рякъяр гъапIну. Мидланра гъайри, РТРС-дин кьувватниинди 98 объектдиина эелктрикдин симар гъизигну, трансформаторин 164 цIийи подстанцйир дивну», – гъапну чан улхбаъ Гьяжимурад Сяидовди.
Дагъустан Республика вари уьлкейихъди сабси цифрайин эфирин телевидениейихъна гъюра.
