Гьаму йисан чвлин призывдин вахтна Урусатдин Яракьлу кьувватариъ гъуллугъ апIуз 3075 дагъустанлуйир гъягъиди. Дидин гьякьнаан октябрин кьюдпи йигъан гъабхьи пресс-конференцияйиъ РД-йин дявдин комиссар Даитбег Мустафаевди мялумат тувнийи.
Дугъан гафариинди, РФ-дин Яракьлу кьувватарин Генштабди чвлин вахтна вари уьлкейиан 132000 касдиз дявдин гъуллугъназ дих апIбан месэла дивну, гьадму кьадарнакан 3075 кас Дагъустандиан душну ккунду. Къайд дапIну ккундуки, республикайиан сад йисазди дявдин гъуллугъназ гъахурайидарин кьадар хьадукратIан чвлин вахтна 150 касдиинди артухъ дубхьна.
«Призывдихъди аьлакьалу вуди, РД-йин Глава Владимир Васильевди районарин, шагьрарин ва республикайин призывдин кампанияйин къайда тяйин апIбан гьякьнаан Указ адабгъну. Вари призывникар сатIи шлу республикайин пункт жигьил эскрар кьабул апIуз гьязурди а. Дявдин гъуллугъназ гъягъюрайи баяриз алабхьру палат, гьаруриз жа-;аради вуйи ипIруб ва жара алатар масу гъадагъна», – гъапну Д.Мустафаевди.
