Табасаран райондин 90-йисандин юбилейиз бахш вуди, «Табасарандин нурар» газатди Табасаран райондин администрацияйин кюмекниинди мектебдин 4-11-пи классариъ урхурайи баяр-шубарин арайиъ «Йиз Табасаран» кIуру конкурс тешкил гъапIнийи.
Конкурс 3 номинацияйикан ибарат вуйи: «Йиз гъул» темайиан варитIан ужуб ихтилат бикIувал, «Йиз Табасаран» темайиан варитIан ужуб шикил зигувал ва авторвалин варитIан ужуб шиир ктабгъувал.
Конкурсдиъ иштирак хьуз ккунидариз чпин яратмиш’валин ляхнар июндин вазлиан 15-пи сентябризкьан хътауз мумкинвал гъабхьнийи. Амма, мектебариъ айи бицIидар хьадан тятIилариз гъягъювал себеб вуди, конкурсдиъ иштирак гъахьидарин кьадар 20 кастIан гъабхьундар.
Сентябрин 27-пи йигъан Табасаран райондин администрацияйиъ жюри уч духьну, конкурсдин натижйир гъивну. Жюрийин арайиъ Табасаран райондин образованиейин Управлениейин начальник Аьбдусалам Гьясанов, Дагъустандин писателарин Союздин член, шаир, публицист Аьбдулмажид Къурбанов, «Табасарандин нурар» газатдин кIулин редактор Гюлягьмад Маллялиев, художник Зейнудин Сулейманов ва Табасаран райондин администрацияйин пресс-секретарь Эльмира Рамазанова айи.
Жюрийин уртахъ мясляаьтниинди, Табасарандикан варитIан ужуб шикил зигбан номинацияйиъ 1-пи йишв Каспийск шагьрин 2-пи нумрайин мектебдин 8-пи классдиъ урхурайи Селимат ТIагьировайиз тувну, 2-пи йишв Хючнаарин 1-пи нумрайин 6-пи классдиъ урхурайи Мариям Нурмягьямедовайи гъадабгъну, хъа 3-пи йишв «Юлдаш» МКОУ ЦО-йин 5-пи классдин ученица Самира Амирхановайиз гъабхьну.
«Йиз гъул» кIуру варитIан ужуб ихтилат бикIбан номинацияйиъ 1-пи йишв гъадабгъур Хючнаарин 1-пи нумрайин мектебдин 4-пи классдин ученик Мягьямед Исмяилов ву. Дугъу «Йиз Ярса гъулан тарих» ихтилат гъибикIну. Му номинацияйиъ кьюбпи йишв «Кюрягъ гъул» кIуру ихтилат дибикIну хътапIу Кюргъярин мектебдин 11-пи классдиъ урхурайи Аьбдуллагь Рамазановдиз тувну. Хъа 3-пи йишван сагьиб гъахьир Хюрккарин кьялан мектебдин 6-пи классдиъ урхурайи Ишрабика Рамазанова ву. Дугъу «Йиз гъул» ихтилат гъибикIну.
Табасарандикан авторвалин шиир бикIбан номинацияйиъ 1-пи йишван сагьиб гъахьир ГьепIларин кьялан мектебдин 3-пи классдиъ урхурайи Маида Пирмягьямедова ву. 2-пи йишв Халагъ гъулан кьялан мектебдин 9-пи классдиъ урхурайи Самира Аьлимирзаевайин «Йиз багъри Халагъ гъул» шиъриз тувну, хъа 3-пи йишв «Табасаран» шиир гъибикIу Гурхъарин кьялан мектебдин 11-пи классдиъ урхурайи Альбина Мирзаевайи гъазанмиш гъапIну.
Учу конкурсдин гъалибчйириз 28-пи сентябриъ, ра-йондин юбилейин серенжемар гъягъюрайи йигъан, пешкешар тувуз ккайча. Хъа юбилейихъди аьлакьалу гизаф серенжемар айивализ лигну, думу йигъан газатдин серенжем тешкил апIуз гъабхьундайи. Гьаддиз улихьна йигъари Табасаран райондин жигьиларин центриъ душван директор Рамис Рамазановдина Хючна гъулан администрацияйин глава Аьбдуселим Гираевди, конкурсдин гъалибчйирна иштиракчйир уч дапIну, дурар пешкешарихъди ва дипломарна грамотйирихъди лишанлу гъапIну.
